មិនធម្មតា! ចិន កំពុងសាងសង់មូលដ្ឋានក្រោមដីសម្រាប់បាញ់មីស៊ីលជាង ១០០ ទីតាំង

រូបភាពពីផ្កាយរណបបង្ហាញថា ប្រទេសចិនកំពុងកសាងនូវអ្វីដែលហាក់ដូចជា មូលដ្ឋាននៅក្រោមដីសម្រាប់បាញ់មីស៊ីល នៅតំបន់វាលខ្សាច់របស់ខ្លួន ។

លោក Jeffrey Lewis នៃវិទ្យាស្ថានស្រាវជ្រាវអន្តរជាតិ Middlebury នៅទីក្រុង Monterey បានបញ្ជាក់ពីសកម្មភាពសាងសង់នៅទីតាំងចំនួន ១១៩ ដោយផ្អែកលើការវិភាគរូបភាពផ្កាយរណប នៃតំបន់វាលខ្សាច់នៅក្នុងខេត្ត Gansu ។

លោក Lewis បានប្រាប់ទូរទស្សន៍ NHK ថា ច្បាស់ណាស់មូលដ្ឋាននៅក្រោមដីនេះ គឺសម្រាប់មីស៊ីលផ្លោងអន្តរទ្វីប (ICBM) ខណៈ ICBM ក៏ទំនងជាត្រូវបានដាក់នៅកន្លែងខ្លះទៀត ក្នុងមូលដ្ឋានក្រោមដីដើម្បីជៀសវាងការរកឃើញ ។

នៅក្នុងរបាយការណ៍ចុងក្រោយរបស់ខ្លួន វិទ្យាស្ថានស្រាវជ្រាវស៊ុយអែតដែលសិក្សាអំពីអំណាចយោធាពិភពលោក បានប៉ាន់ស្មានថា ប្រទេសចិនមានក្បាលគ្រាប់នុយក្លេអ៊ែរចំនួន ៣៥០ គ្រាប់ ។

ចំណែកក្រុមអ្នកជំនាញនិយាយថា ការសាងសង់មូលដ្ឋានក្រោមដីសម្រាប់បាញ់មីស៊ីល បង្ហាញថា ចិនកំពុងបង្កើនសមត្ថភាពនុយក្លេអ៊ែរយ៉ាងខ្លាំងក្លារបស់ខ្លួន ។

ការវិវឌ្ឍន៍ចុងក្រោយនេះ អាចក្លាយជាចំណុចវិវាទថ្មីរវាងចិន និងសហរដ្ឋអាមេរិក ដែលកំពុងប្រយ័ត្នប្រយែងដល់ការបង្កើតនុយក្លេអ៊ែររបស់ចិន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចិន ប្រកាសបញ្ចប់ជំងឺកាចសាហាវមួយនេះ លែងមានក្នុងប្រទេសទៀតហើយ