ទើបព្រមានម្សិលមិញ ថ្ងៃនេះ ថៃ ប្រកាសមានអ្នកស្លាប់ដោយសារកូវីដ ច្រើនបំផុត បំបែកកំណត់ត្រានិងឆ្លងជាង ៧ពាន់ករណី

ក្រសួងសុខាភិបាលថៃ បានរាយការណ៍នៅព្រឹកថ្ងៃព្រហស្បតិ៍នេះថា ក្នុងរយៈពេល២៤ម៉ោងចុងក្រោយ ប្រទេសថៃ មានអ្នកស្លាប់ដោយសារជំងឺកូវីដ-១៩ ក្នុងកម្រិតខ្ពស់បំផុតមិនធ្លាប់មាន ៧៥នាក់និងឆ្លងថ្មី ៧,០៥៨ករណី។

ក្នុងចំណោមការឆ្លងថ្មី មាន ៦,៩៩០ករណីជាប្រជាជនទូទៅនិង ៦៨ ករណីជាអ្នកទោសជាប់ពន្ធនាគារ។

ស្របពេលជាមួយគ្នានោះដែរ អ្នកជំងឺកូវីដ ចំនួន ៤,៩៧៨ នាក់ បានជាសះស្បើយ និងត្រូវបានអនុញ្ញាតឲ្យចាកចេញពីមន្ទីរពេទ្យ។

ចាប់តាំងពីថ្ងៃទី១ខែមេសាមក នៅពេលកូវីដរលកទី៣ផ្ទុះឡើង មានអ្នកជំងឺកូវីដចំនួន ២៧៩,៣៦៧ នាក់ ក្នុងនោះមាន ២០៨,៧២៣នាក់បានជាសះស្បើយ។

ចាប់តាំងពីជំងឺរាតត្បាតផ្ទុះឡើងកាលពីដើមឆ្នាំមុន មានការឆ្លងសរុប ៣០៨,២៣០ករណី ក្នុងនោះមាន ២៣៦,១៤៩នាក់ បានជាសះស្បើយ។

ចំណែកចំនួនអ្នកស្លាប់ក្នុងរលកទី៣គឺមាន ២,៣៦៨នាក់ ធ្វើឲ្យការស្លាប់សរុបចាប់តាំងពីរោគរាតត្បាតផ្ទុះឡើងកាលពីដើមឆ្នាំមុនមក កើនដល់ ២,៤៦២នាក់។

កំណត់ត្រាចាស់ នៃអ្នកស្លាប់ខ្ពស់បំផុតដោយសារកូវីដនៅប្រទេសថៃ គឺចំនួន៦១នាក់ កាលពីថ្ងៃសុក្រ សប្តាហ៍មុន។

កំណត់ត្រាថ្មីនេះ បានកើតឡើងបន្ទាប់ពី មជ្ឈមណ្ឌលរដ្ឋបាលស្ថានភាពជំងឺកូវីដ-១៩​ (CCSA) បានព្រមានថា ចំនួនមធ្យមនៃករណីឆ្លងកូវីដប្រចាំថ្ងៃ នឹងកើនឡើងទ្វេដងក្នុងរយៈពេលប៉ុន្មានសប្តាហ៍ខាងមុខនេះ ខណៈបច្ចុប្បន្ន មន្ត្រីសុខាភិបាលកំពុងត្រៀមខ្លួនសម្រាប់ករណីថ្មីប្រចាំថ្ងៃ ដែលអាចឈានដល់១០,០០០ករណី។

ដោយសារតែវីរុសបំប្លែងខ្លួន Delta, ថៃមិនមែនជួបប្រទះត្រឹមតែចំនួននៃការឆ្លងថ្មីកើនឡើងប៉ុណ្ណោះទេ ប៉ុន្តែចំនួនអ្នកជំងឺដែលស្ថិតក្នុងស្ថានភាពធ្ងន់ធ្ងរនិងដាក់ខ្យល់អុកស៊ីសែន ក៏កើនឡើងផងដែរ។

ប្រធាននាយកដ្ឋានព័ត៌មាននៃក្រសួងការបរទេសលោកស្រី Pensom Lertsithichai បានឲ្យដឹងថា CCSA រំពឹងថា ករណីធ្ងន់ធ្ងរនឹងបន្តកើនឡើង។ អ្វីដែលយើងកំពុងជួបប្រទះនៅក្នុងប្រទេសថៃ គឺការរីករាលដាលយ៉ាងឆាប់រហ័សនៃវីរុសបំប្លែងខ្លួន Delta។

ប្រែសម្រួល៖ Vann Vann

ប្រភព៖ Bangkok Post

ចុចអាន៖ វីរុសបំប្លែងខ្លួន Delta កំពុងវាយលុក! ថៃ ព្រមានអំពីស្ថានភាពអាក្រក់បំផុត មួយថ្ងៃអាចឆ្លង ១ម៉ឺនករណី