អាល្លឺម៉ង់ ត្រៀមផលិតវ៉ាក់សាំងការពារជំងឺគ្រុនចាញ់

បន្ទាប់ពីផលិតវ៉ាក់សាំងបង្ការ Covid-19 ជាមួយបច្ចេកវិទ្យា mRNA បានដោយជោគជ័យ ពេលនេះក្រុមហ៊ុន BioNTech របស់អាល្លឺម៉ង់គ្រោងនឹងប្រើបច្ចេកវិទ្យាដូចគ្នានេះដើម្បីបង្កើតវ៉ាក់សាំងប្រឆាំងជំងឺគ្រុនចាញ់ដំបូងបំផុត។

គម្រោងផលិតវ៉ាក់សាំងបង្ការជំងឺគ្រុនចាញ់នេះ ត្រៀមនឹងចាប់ផ្ដើមសាកល្បងគ្លីនិកនៅឆ្នាំ ២០២២ ដែលវាជាគំនិតផ្តួចផ្តើមក្នុងការ “លុបបំបាត់ជំងឺគ្រុនចាញ់” និងត្រូវបានគាំទ្រដោយអង្គការសុខភាពពិភពលោក (WHO) និងមជ្ឈមណ្ឌលគ្រប់គ្រងនិងបង្ការជំងឺអាហ្វ្រិក (CDC) ។

លោកសាស្រ្តាចារ្យបណ្ឌិត Ugur Sahin នាយកប្រតិបត្តិនិងជាសហស្ថាបនិកក្រុមហ៊ុន BioNTech មានប្រសាសន៍ថា “ការឆ្លើយតបទៅនឹងរោគរាតត្បាតបានបង្ហាញថា វិទ្យាសាស្ត្រនិងការច្នៃប្រឌិតអាចផ្លាស់ប្តូរជីវិតរបស់មនុស្សដើម្បីគោលបំណងរួមមួយ”។ ក្នុងនោះការបង្កើតវ៉ាក់សាំងតាមបច្ចេកវិទ្យាទំនើបជាដំណោះស្រាយដើម្បីបញ្ចប់ជំងឺរាតត្បាត។

វ៉ាក់សាំងប្រើបច្ចេកវិទ្យា mRNA ជាវ៉ាក់សាំងជំរុញឱ្យរាងកាយមនុស្សបង្កើតសរសៃប្រូតេអ៊ីនចេញធាតុបង្កជំងឺ ដើម្បីបង្កឱ្យមានប្រតិកម្មភាពស៊ាំឆ្លើយតបទៅនឹងវីរុសវិញ។

គោលបំណងរបស់ក្រុមហ៊ុន BioNTech គឺបង្កើតវ៉ាក់សាំងបច្ចេកវិទ្យា mRNA ប្រកបដោយសុវត្ថិភាព និងប្រសិទ្ធភាពខ្ពស់ជាមួយនឹងភាពស៊ាំការពារយូរអង្វែងដើម្បីបង្ការជំងឺគ្រុនចាញ់និងអត្រាមរណភាពបណ្ដាលមកពីជំងឺនេះផងដែរ។

ក្រុមហ៊ុនឱសថយក្សនេះក៏កំពុងស្វែងរកជំនួយពីដៃគូសហការដើម្បីបង្កើតរោងចក្រផលិតគ្រឿងអេឡិចត្រូនិក mRNA ដែលទំនើបបំផុត ដើម្បីឆាប់ដំណើរការផលិតកម្មកាន់តែឆាប់រហ័ស។ គេរំពឹងថា វានឹងដំណើរការនៅដើមឆ្នាំ ២០២២៕

ប្រែសម្រួល៖ សន្យា

ប្រភព៖ India Today

ចុចអាន៖ ក្រុមហ៊ុនឱសថមួយរបស់ ជប៉ុន ចាប់ផ្តើមធ្វើតេស្តថ្នាំគ្រាប់ព្យាបាលកូវីដ