កម្ពុជារំពឹងថានឹងឈានទៅសម្រេចគោលដៅគ្មានជំងឺគ្រុនចាញ់កើតថ្មីនាដំណាច់ឆ្នាំ២០២៥នេះ

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅព្រឹកថ្ងៃទី១៩តុលាថា កម្ពុជារំពឹងថានឹងឈានទៅសម្រេចបានគោលដៅក្នុងការលប់បំបាត់ជំងឺគ្រុនចាញ់កើតថ្មីក្នុងប្រទេសនាដំណាច់ឆ្នាំ២០២៥នេះ។

ប្រទេសកម្ពុជាបានដាក់ចេញយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ដែលជាត្រីវិស័យដ៏ត្រឹមត្រូវ ដែលសមស្របតាមយុទ្ធសាស្រ្តតំបន់ និងសកលលោកបានធ្វើឱ្យករណីជំងឺគ្រុនចាញ់បន្តធ្លាក់ចុះជាបន្តបន្ទាប់ និងបានបញ្ចប់លែងមានករណីស្លាប់ ដោយសារជំងឺគ្រុនចាញ់តាំងពីឆ្នាំ២០១៨ ខណៈមុនអនុវត្តយុទ្ធសាស្ត្រនេះមានករណីជំងឺគ្រុនចាញ់ជាមធ្យម ១៣ម៉ឺនករណី និងស្លាប់ ៧០០ ទៅ ៨០០នាក់ ក្នុងមួយឆ្នាំៗ។

លោកវេជ្ជបណ្ឌិតបានបន្តថា គិតត្រឹមដើមខែតុលា ឆ្នាំ២០២៥ កម្ពុជាមានករណីជំងឺគ្រុនចាញ់ក្នុងប្រទេសសរុបចំនួន ៥២ករណី និងករណីនាំចូលពីប្រទេសក្រៅមានចំនួន ៤៦ករណី។ ហេតុនេះ ឆ្នាំ២០២៥នេះ បានកាត់បន្ថយ ៨២% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២៤ ដែលមានរហូតដល់ទៅចំនួន២៩៧ករណី ដែលនេះបង្ហាញថាកម្ពុជា កំពុងស្ថិតលើផ្លូវត្រឹមត្រូវដោយមោទនភាពក្នុងការឈានទៅសម្រេចបានគោលដៅគ្មានគ្រុនចាញ់ថ្មីកើតក្នុងប្រទេសនាដំណាច់ឆ្នាំ២០២៥នេះ។

លោកវេជ្ជបណ្ឌិតបានបន្តទៀតថា ការធ្លាក់ចុះនេះដោយសារមានការយកចិត្តទុកដាក់ និងគាំទ្រខ្ពស់ពីក្រសួងសុខាភិបាល និងមានកិច្ចសហការពេញលេញពីគ្រប់ដៃគូពាក់ព័ន្ធ ក្រោមយន្តការសម្របសម្រួលអភិបាលកិច្ចតម្រង់ទិសបច្ចេកទេសផ្ទាល់ជាប្រចាំរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ។ ក្រៅពីនេះ យើងបានបន្ថែមវិធីសាស្ត្រ និងបង្កើនការផ្សព្វផ្សាយដល់ប្រជាពលរដ្ឋរស់នៅក្នុងសំបុកចម្លងជំងឺគ្រុនចាញ់ឱ្យបានយល់ដឹងកាន់តែច្បាស់ពីវិធីការពារជំងឺគ្រុនចាញ់ ផ្តល់ថ្នាំបង្ការការពារដល់ពលរដ្ឋរស់នៅតំបន់ប្រឈមខ្ពស់ជាងគេទៅនឹងជំងឺគ្រុនចាញ់ ក៏ដូចជាផ្តល់មុងជ្រលក់ថ្នាំដល់ពលរដ្ឋមានមុខរបរចូលព្រៃប្រចាំថ្ងៃផងដែរ៕

អត្ថបទ៖ សំអឿន