ចិន ដាក់ការរឹតត្បិតថ្មី ខណៈ វីរុសបំប្លែងខ្លួនឥណ្ឌា Delta វាយលុកជិតពាក់កណ្តាលប្រទេស

ប្រទេសចិនបានដាក់ការរឹតត្បិតលើការធ្វើដំណើរថ្មី ចំពេលមានការផ្ទុះឡើងនៃវីរុសបំប្លែងខ្លួនឥណ្ឌា “Delta” ដែលបានឆ្លងរីករាលដាលដល់ជាង ៥០០ ករណី ក៏ដូចជាកើតមានឡើងជិតពាក់កណ្តាលប្រទេសហើយ ។

ការរឹតត្បិតនេះក៏កើតឡើង ស្របពេលដែលនៅថ្ងៃព្រហស្បតិ៍នេះ គណៈកម្មការសុខភាពជាតិចិន (NHC) បានបង្ហាញថា ប្រទេសចិនបានកត់ត្រាករណីឆ្លងថ្មីនៃជំងឺកូវីដ ១៩ ចំនួន ៨៥ ករណី ក្នុងនោះ ៦២ ករណីជាករណីឆ្លងក្នុងសហគមន៍ និង ២៣ ករណីជាករណីនាំចូល ។

ទន្ទឹមនោះ សេវាដឹកជញ្ជូនសាធារណៈ និងតាក់ស៊ីត្រូវបានកាត់បន្ថយនៅក្នុងតំបន់ចំនួន ១៤៤ ដែលរងគ្រោះខ្លាំងជាងគេនៅទូទាំងប្រទេស ខណៈដែលមន្រ្តីបានរារាំងសេវាកម្មរថភ្លើង និងការប្រើប្រាស់រថភ្លើងក្រោមដីនៅទីក្រុងប៉េកាំង ដែលមានករណីឆ្លងថ្មីចំនួន ៣ ករណីត្រូវបានរាយការណ៍កាលពីថ្ងៃពុធ ។

ចំណែកទីក្រុងហុងកុង ក៏បានដាក់ការធ្វើចត្តាឡីស័កសាជាថ្មីផងដែរ លើអ្នកដំណើរមកពីចិនដីគោក លើកលែងតែសម្រាប់ខេត្ត Guangdong ភាគខាងត្បូងដែលនៅជិតទីក្រុងហិរញ្ញវត្ថុរបស់ខ្លួន ។

គួរបញ្ជាក់ថា គិតត្រឹមពេលនេះ ចិនដីគោក បានកត់ត្រាករណីឆ្លងជំងឺកូវីដ ១៩ ចំនួន ៩៣,៣៧៤ ករណី ខណៈអ្នកស្លាប់នៅតែ ៤,៦៣៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ រាល់វ៉ាក់សាំង ចិន អាចការពារមនុស្សប្រឆាំង វីរុសបំប្លែងខ្លួនឥណ្ឌា Delta ជាពិសេសមិនឲ្យឈឺធ្ងន់ធ្ងរ