ជាងពាក់កណ្តាលនៃជនភៀសខ្លួន អាហ្វហ្គានីស្ថាន ក្រោមការកាន់កាប់របស់ តាលីបង់ គឺជាកុមារ

អង្គការសហប្រជាជាតិ (UN) បាននិយាយថា ស្ទើរតែ ៦០ ភាគរយនៃជនជាតិអាហ្វហ្គានីស្ថានដែលត្រូវបានបង្ខំឲ្យចាកចេញពីផ្ទះរបស់ពួកគេនៅឆ្នាំនេះ គឺជាកុមារ ។

យោងតាមតួលេខដែលចេញផ្សាយដោយការិយាល័យសម្របសម្រួល កិច្ចការមនុស្សធម៌របស់អង្គការសហប្រជាជាតិ (UNOCHA) នៅអាហ្វហ្គានីស្ថានបានឲ្យដឹងថា មនុស្សជាង ៤០ ម៉ឺននាក់ត្រូវបានចុះឈ្មោះជាអ្នកផ្លាស់ទីលំនៅថ្មី ចាប់តាំងពីដើមខែឧសភា ដោយសារការប្រយុទ្ធគ្នាកាន់តែខ្លាំងឡើងនៅទូទាំងប្រទេស ។

UNOCHA បាននិយាយថា សរុបមកប្រជាជនអាហ្វហ្គានីស្ថានជិត ៥៥ ម៉ឺននាក់ត្រូវបានផ្លាស់ទីលំនៅតាំងពីឆ្នាំនេះ ។

ការវាយលុកយ៉ាងឆាប់រហ័សរបស់ក្រុមតាលីបង់ នៅទូទាំងខេត្តស្ទើរតែទាំងអស់របស់អាហ្វហ្គានីស្ថាន បានធ្វើឲ្យប្រទេសនេះកាន់តែតានតឹងថែមទៀត ខណៈមនុស្ស ១៨ លាននាក់កំពុងត្រូវការជំនួយមនុស្សធម៌ ។

គួរបញ្ជាក់ថា ទីក្រុងកាប៊ុលបានធ្លាក់ទៅលើដៃក្រុមតាលីបង់កាលពីថ្ងៃទី ១៥ ខែសីហា បន្ទាប់ពីប្រធានាធិបតីលោក Mohammad Ashraf Ghani បានភៀសខ្លួនចេញពីប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ ក្រុមតាលីបង់សម្លាប់ សូម្បីតែកុមារស្លូតត្រង់