ប៉ូលិសជប៉ុន ចាប់ខ្លួនបុរសម្នាក់ ដើរលួចខោអាវក្នុងស្រីៗ រកឃើញរាប់រយឈុត នៅពេញផ្ទះ

ប៉ូលិសនៅទីក្រុង Beppu ភាគខាងត្បូងប្រទេសជប៉ុន បានចាប់ខ្លួនបុរសម្នាក់ដែល លួចខោអាវក្នុងរបស់ស្ត្រីរាប់រយឈុត ពីកន្លែងបោកខោអាវនានា។

ពីដំបូង អាជ្ញាធរត្រូវបានជូនដំណឹង ដោយនិស្សិតស្រីអាយុ ២១ ឆ្នាំមិនបញ្ចេញឈ្មោះម្នាក់ ដែលបានចោទប្រកាន់ថា បុរសឈ្មោះ Tetsuo Urata អាយុ ៥៦ ឆ្នាំ បានលួចខោអាវក្នុងចំនួន ៦ ឈុតពីនាងនៅឯកន្លែងបោកខោអាវ កាលពីថ្ងៃទី ២៤ ខែសីហា។

នៅសប្តាហ៍នោះ ប៉ូលិសក្រុងក៏បានទៅដល់ផ្ទះរបស់ Urata ហើយពួកគេបានរកឃើញខោអាវក្នុងចំនួន ៧៣០ នៅក្នុងអាផាតមិនរបស់គាត់។ លោក Urata ត្រូវបានចាប់ខ្លួននិង សារភាពប្រាប់ប៉ូលិសថា គាត់ពិតជាបានលួចខោអាវក្នុងរបស់ស្រីៗមែន។

អ្នកនាំពាក្យនាយកដ្ឋានប៉ូលិសក្រុង Beppu បានប្រាប់ទូរទស្សន៍ Abema ថា “យើងមិនដែលរឹបអូសខោអាវក្នុងបានច្រើនបែបនេះទេ នារយៈពេលជាច្រើនឆ្នាំមកនេះ”។

បច្ចុប្បន្ន ប៉ូលិសទីក្រុង Beppu កំពុងធ្វើការស៊ើបអង្កេតបន្ថែមលើករណីនេះ។

គួរបញ្ជាក់ថា ករណីជាច្រើនទៀត ដែលជាប់ទាក់ទងនឹងបុរសលួចខោអាវក្នុងរបស់ស្រីៗ បានកើតឡើងនៅប្រទេសជប៉ុនក្នុងរយៈពេលប៉ុន្មានឆ្នាំចុងក្រោយនេះ។

ករណីចុងក្រោយបំផុតគឺក្នុងខែមីនា នៅពេលបុរសម្នាក់ឈ្មោះ Takahiro Kubo អាយុ ៣០ ឆ្នាំជាជាងអគ្គិសនី ត្រូវបានអាជ្ញាធរចាប់ខ្លួនក្នុងខេត្ត Saga ភាគនិរតី ដោយសារលួចខោអាវក្នុង និងឈុតហែលទឹកចំនួន ៤២៤ ពីក្មេងស្រីជំទង់៕

ប្រែសម្រួល៖ Vann Vann

ប្រភព៖ Insider

ចុចអាន៖ វៀតណាម រឹបអូសថ្នាំ Lianhua Qingwen រត់ពន្ធខុសច្បាប់មកពីប្រទេស ចិន