អ្នកកាសែតអាមេរិក ជាប់ពន្ធនាគារ ១១ឆ្នាំ នៅមីយ៉ាន់ម៉ា

តុលាការនៅក្នុងប្រទេសមីយ៉ាន់ម៉ាដែលគ្រប់គ្រងដោយយោធា នៅថ្ងៃសុក្រទី១២ខែវិច្ឆិកានេះ បានកាត់ទោសអ្នកកាសែតជនជាតិអាមេរិកឈ្មោះ Danny Fenster ដាក់ពន្ធនាគាររយៈពេល១១ឆ្នាំ។ នេះបើតាមការឲ្យដឹងពីមេធាវី និងនិយោជករបស់គាត់។

លោក Fenster អាយុ៣៧ឆ្នាំដែលជាអ្នកគ្រប់គ្រងទស្សនាវដ្តីអនឡាញ Frontier Myanmar ត្រូវបានចាប់ខ្លួន ខណៈពេលព្យាយាមចាកចេញពីប្រទេសកាលពីខែឧសភា ហើយចាប់តាំងពីពេលនោះមក ត្រូវបានឃុំខ្លួននៅក្នុងពន្ធនាគារ Insein ដ៏ល្បីល្បាញរបស់ទីក្រុង យ៉ាំងហ្គោន។

ការកាត់ទោសនេះត្រូវបានបញ្ជាក់ប្រាប់ Reuters ដោយមេធាវីឈ្មោះ Than Zaw Aung តែលោកមិនបានផ្តល់ព័ត៌មានលម្អិតបន្ថែមទៀតឡើយ។

គាត់ត្រូវបានកាត់ទោសពីបទញុះញង់ និងបំពានច្បាប់អន្តោប្រវេសន៍ និងច្បាប់សមាគមដែលមិនស្របច្បាប់។ 

ការចោទប្រកាន់ថ្មីៗ ដែលធ្ងន់ធ្ងរជាងនេះ ពាក់ព័ន្ធការបះបោរ និងការរំលោភច្បាប់ភេរវកម្ម ត្រូវបានបន្ថែមកាលពីដើមសប្តាហ៍នេះ ហើយបើត្រូវផ្តន្ទាទោសមែននោះ គាត់ប្រឈមនឹងការជាប់ពន្ធនាគារអតិបរមា ២០ឆ្នាំ៕

ប្រែសម្រួល៖ Vann Vann

ប្រភព៖ CNA

ចុចអាន៖ មីយ៉ាន់ម៉ា ចោទ ប្រកាន់ អ្នក កាសែត អាមេរិក ពី បទ ភេរវកម្ម