ផ្ទុះការបាញ់ប្រហារនៅថ្ងៃ Black Friday ផ្អើលឆោឡោពេញផ្សារទំនើប អាមេរិក (មានវីដេអូ)

អតិថិជនក្នុងផ្សារ​ទំនើប​មួយកន្លែងនៅរដ្ឋ North Carolina ត្រូវ​បាន​ជម្លៀស​ចេញ ​បន្ទាប់​ពី​មនុស្ស​បី​នាក់ ​ត្រូវ​បាន​គេ​បាញ់​កាលពី​រសៀល​ថ្ងៃ​សុក្រចំថ្ងៃ Black Friday។

ប៉ូលិសនៅទីក្រុង Durham នៃរដ្ឋ North Carolina បាននិយាយកាលពីថ្ងៃសុក្រថា “នាយកដ្ឋានប៉ូលិសទីក្រុង Durham (DPD) កំពុងស៊ើបអង្កេតឧប្បត្តិហេតុបាញ់ប្រហារនៅផ្សារទំនើប The Streets at Southpoint។ ផ្សារទំនើបនេះបានជម្លៀសមនុស្សចេញ ហើយនឹងត្រូវបិទ ខណៈ DPD ស៊ើបអង្កេតឧបទ្ទវហេតុនេះ។ មិនមានការគំរាមកំហែងបន្ថែមទៀតនៅក្នុងហាងនោះទេ”។

យោងតាមសារព័ត៌មាន Fox 8 បានឲ្យដឹងថា មនុស្សម្នាក់ត្រូវនាំទៅឃុំឃាំងពាក់ព័ន្ធនឹងការបាញ់ប្រហារ ហើយមនុស្ស៣នាក់ត្រូវបានគេរាយការណ៍ថា ត្រូវគ្រាប់កាំភ្លើង។

វីដេអូ​ដែល​បាន​បង្ហោះ​លើ​បណ្តាញ​សង្គម ​បាន​បង្ហាញ​ពី​អតិថិជនក្នុងផ្សារ​ទំនើប ​រត់​ចេញ​ពី​កន្លែង​កើតហេតុ។

មេប៉ូលិសក្រុង Durham លោក Patrice Andrews បាននិយាយនៅក្នុងសន្និសីទសារព័ត៌មានថា ការបាញ់ប្រហារនេះបានកើតឡើងបន្ទាប់ពីមានការឈ្លោះប្រកែកគ្នា រវាងក្រុមពីរដែលស្គាល់គ្នា ហើយក្មេងអាយុ១០ឆ្នាំម្នាក់ បានរងរបួសដោយសារគ្រាប់កាំភ្លើង។

លោក Andrews បន្ថែមថា ប៉ូលិសកំពុងស្វែងរកជនសង្ស័យបន្ថែម៕

សូមទស្សនាវីដេអូ៖ 

ប្រែសម្រួល៖ Vann Vann

ប្រភព៖ FOX

ចុចអាន៖ រឿងពិតនៃថ្ងៃសុក្រពណ៌ខ្មៅ ឬ Black Friday ចាប់ផ្ដើមឡើងបែបនេះ