វ៉ាក់សាំងកូវីដ ថៃ ៤ ប្រភេទ ចាប់ផ្ដើមធ្វើតេស្តលើមនុស្សជាបណ្ដើរៗ និងចាយថវិកាសរុប ៤.៨ ពាន់លានបាត

លោកស្រី Ratchada Thanadirek អ្នកនាំពាក្យរងទីស្តីការ​នាយករដ្ឋមន្ត្រី​បាន​បង្ហើប​ថា នៅក្នុងកិច្ចប្រជុំរបស់មជ្ឈមណ្ឌលគ្រប់គ្រងស្ថានការណ៍​កូវីដ១៩ (CDC) កាលពីម្សិលមិញ នាយករដ្ឋមន្ត្រីបាននឹងកំពុងតាមដានវឌ្ឍនភាពនៃការស្រាវជ្រាវវ៉ាក់សាំងនៅក្នុងប្រទេសថៃ។

វាត្រូវបានគេរាយការណ៍ថា វ៉ាក់សាំងទាំងបួនកំពុងត្រូវបានធ្វើតេស្តលើមនុស្ស និង​ទទួល​បាន​ការ​គាំទ្រ​ថវិកា​សម្រាប់​ការ​អភិវឌ្ឍន៍​តាម​កាលកំណត់ សរុប​ចំនួន ៤.៨ ពាន់​លាន​បាត (១៤២,៥២២,១២៨,០០ ដុល្លារ ​)។

វ៉ាក់សាំង NDV-HXP-S បង្កើតឡើងដោយអង្គការ​ឱសថ​រដ្ឋាភិបាល (GPO) រួមជាមួយ​នឹង​សាកលវិទ្យាល័យ Mahidol បាន​ទទួល​ថវិកា​ពី​រដ្ឋាភិបាល​តាម​រយៈ​វិទ្យាស្ថាន​ជាតិ​វ៉ាក់សាំង (NHSO) ៤៥.៨៨ លាន​បាត។ ការ​សាកល្បង​មនុស្ស​ដំណាក់កាល​ទី ២ បាន​ចាប់ផ្តើម​នៅ​ថ្ងៃទី ១៦ ខែ សីហា។ លទ្ធផល​ត្រូវ​បាន​រំពឹង​ទុក​ក្នុង​ខែធ្នូ។ សំណើរ​ថវិកា​កំពុង​រង់ចាំ សម្រាប់​ការ​គាំទ្រ​ និងការ​ធ្វើ​តេស្ត​ដំណាក់កាលទី ៣ ។

វ៉ាក់សាំង Chula-Cov19 ត្រូវបានបង្កើតឡើងដោយមជ្ឈមណ្ឌលស្រាវជ្រាវវ៉ាក់សាំង នៃមហាវិទ្យាល័យ​ឱសថ សាកលវិទ្យាល័យ Chulalongkorn ទទួល​បាន​ថវិកា​ពី​រដ្ឋាភិបាល​តាម​រយៈ​វិទ្យាស្ថាន​ជាតិ​ថ្នាំ​បង្ការ (NHSO) ក្នុង​ទឹក​ប្រាក់​ចំនួន ៣៧៥​ លាន​បាត ការ​ធ្វើ​តេស្ត​លើ​មនុស្ស​ដំណាក់​កាល​ទី​២ ចាប់​ពី​ថ្ងៃ​ទី​៤ ខែ​សីហា លទ្ធផល​រំពឹង​ទុក​ក្នុង​ខែ​ធ្នូ និងសម្រាប់ការសាកល្បងព្យាបាលដំណាក់កាលទី ៣ ​ផលិតសម្រាប់ការ​ចុះឈ្មោះវ៉ាក់សាំង ​សម្រាប់ប្រើប្រាស់ក្នុងគ្រាអាសន្ន។ គណៈរដ្ឋមន្ត្រីបានអនុម័តថវិកាចំនួន ២,៣១៦ លានបាត​។

វ៉ាក់សាំង Baiya SARS-CoV-2 Vax ត្រូវបានបង្កើតឡើងដោយក្រុមហ៊ុន Baiya Phytofarm និង​សាកលវិទ្យាល័យ Chulalongkorn បានទទួលថវិកាពីចំនួន ១៦០ លានបាត។ បច្ចុប្បន្ននេះ វាស្ថិតនៅក្នុងដំណាក់កាលសាកល្បងមនុស្ស ដំណាក់កាលទី ១ ចាប់ផ្តើមពីខែតុលា ហើយថ្មីៗនេះ គណៈរដ្ឋមន្ត្រីបានអនុម័តដែនកំណត់ចំនួន ១,៣០៩ លានបាត ពីច្បាប់ប្រាក់កម្ចី​ ដើម្បី​ប្រើ​ក្នុង​ការ​ស្រាវ​ជ្រាវ​និង​ការ​បង្កើត​វ៉ាក់សាំង ​ក្នុង​ការ​ធ្វើ​តេស្ដ​មនុស្ស​ដំណាក់កាល​ទី​៣​ផង​ដែរ​។

និង វ៉ាក់សាំង Covid-19 ដោយ Bionet-Asia បានទទួលថវិកាពីចំនួន ៦៥០លានបាត និងតេស្តលើមនុស្សដំណាក់កាលទី១ តាំងពីថ្ងៃទី ២៥ ខែមិថុនា ដើម្បីសិក្សាពីសុវត្ថិភាព និងជំរុញ​ភាពស៊ាំ។ បច្ចុប្បន្ន ការធ្វើតេស្តកំពុងត្រូវបានរៀបចំក្នុងដំណាក់កាលទី២។

ទន្ទឹម​នោះ​ នាយករដ្ឋមន្ត្រី​បាន​ផ្តល់​សារៈសំខាន់ និង​ត្រៀមខ្លួន​ជា​ស្រេចក្នុង​ការ​គាំទ្រ​ថវិកា​សម្រាប់​ការ​ស្រាវជ្រាវ និង​អភិវឌ្ឍន៍​វ៉ាក់សាំង​ជាតិ​ថៃ​គ្រប់​ជំហាន។ ចាប់តាំង​ពីដំណើរការនៃ R & D ការ​ធ្វើ​តេស្ត​ការអនុវត្ត ការចុះឈ្មោះ ដើម្បី​ឲ្យ​វាអាច​ប្រើបានពេញរង្វង់ ពង្រឹង​សុវត្ថិភាព​វ៉ាក់សាំង​របស់​ប្រទេស នេះ​ជា​ក្ដី​សង្ឃឹម​មួយ​ទៀត ​ក្នុង​ការ​គ្រប់​គ្រង​ការ​រីក​រាល​ដាល​នៃ​ជំងឺ​កូវីដ និង​បង្កើន​សក្ដានុពល​នៃ​ការ​គ្រប់គ្រង​សុខភាព​របស់​ប្រទេស ​ក្នុង​រយៈពេលយូរ៕

ប្រែសម្រួល៖ សាង ស្រីល័ក្ខ

ប្រភព៖sanook

ចុចអាន៖ប្រទេសនៅ អឺរ៉ុប មួយទៀត ​ ប្រកាសរកឃើញវីរុសកូវីដបំប្លែងខ្លួន Omicron