ថៃ​ប្រកាស​អ្នក​ស្លាប់​ដោយ​កូវីដ​ទាប​បំផុត​គិត​ចាប់​ពី​ខែ​មេសា​ឆ្នាំមុនមក

ប្រទេសថៃមានអ្នកស្លាប់ដោយកូវីដ-១៩ត្រឹមតែ១២នាក់ប៉ុណ្ណោះក្នុងរយៈពេល២៤ម៉ោងចុងក្រោយគិតត្រឹមរសៀល ថ្ងៃអង្គារ៍ ទី៤ ខែមករា ដែលនេះជាចំនួនស្លាប់តិចបំផុតគិតចាប់តាំងពីថ្ងៃទី២៩ ខែមេសា ឆ្នាំ២០២១។

ចំពោះអ្នកឆ្លងថ្មីដោយកូវីដ-១៩ក្នុងរយៈពេល២៤ម៉ោងចុងក្រោយមាន៣០៩១នាក់។ នេះបើយោង​តាមសេចក្តីប្រកាសរបស់ក្រសួងសុខាភិបាលថៃនាព្រឹកថ្ងៃអង្គារ៍នេះ។ ក្នុងចំណោមអ្នកឆ្លងថ្មីនេះគឺកើតមានប្រជាជនទូទៅ និងអ្នកជាប់ពន្ធនាគារ២នាក់។

កាលពីថ្ងៃចន្ទម្សិលមិញ មានអ្នកជំងឺជាសះស្បើយចាកចេញពីមន្ទីរ២៦៨៨នាក់។ មជ្ឈមណ្ឌលគ្រប់គ្រងស្ថានភាពកូវីដ-១៩ (CCSA) ថៃបាននិយាយថា គិតត្រឹមរសៀលថ្ងៃអង្គារ៍នេះ មានអ្នកស្លាប់ថ្មី១២នាក់ដែលជាជនថៃទាំងអស់អាយុចន្លោះពី៦១ ដល់៩៨ឆ្នាំ។

ទីក្រុងបាំងង និងខេត្តបាទុមថានី សាមុតសាខន សាមុតប្រាកាន ណាខុន​ផាថុម និងនុតថាបុរីមិនមានអ្នកស្លាប់ទេ។
ទោះបីជាចំនួនអ្នកស្លាប់ធ្លាក់ចុះទាបបំផុតជាលើកដំបូងគិតចាប់តាំងពីខែមេសា ឆ្នាំមុនមក ក៏ចំនួនអ្នកឆ្លងថ្មីនៅតែបន្តកើនឡើងដោយសារតែវីរុសបំប្លែងខ្លួនថ្មី Omicron កំពុងរាតត្បាតយ៉ាងលឿន។

កាលពីថ្ងៃចន្ទម្សិលមិញមានអ្នកជំងឺកូវីដប្រមាណ ៣៣ ៥០៥នាក់បានចូលព្យាបាលនៅមន្ទីរពេទ្យ ក្នុងនោះមាន៥៥៥នាក់ឈឺធ្ងន់ធ្ងរ និង១៥១នាក់ត្រូវការអ៊ុកស៊ីសែន។

គិតចាប់តាំងពីកូវីដបានចាប់ផ្តើមនាដើមឆ្នាំ២០២០មក ថៃមានករណីឆ្លងកូវីដ-១៩សរុប ២ ២៣៥ ៥៧៦នាក់ និងអ្នកស្លាប់ ២១ ៧៥០នាក់។

ចំនួនឆ្លងខ្ពស់កំបុតជាប់កំណត់ត្រារបស់ថៃគឺ ២៣ ៤១៨នាក់កាលពីថ្ងៃទី១៣ ខែសីហា ឆ្នាំ២០២១៕

ប្រែសម្រួល៖ វីរបុត្រ
ប្រភព៖ bangkokpost