ព័ត៌មានអន្ដរជាតិ

អ្នកជំនាញថៃម្នាក់ប្រាប់ហេតុផលដែលកូវីដនឹងចប់ចុងឆ្នាំនេះ

បានផុស

២ years មុន

នៅ

ថ្ងៃអង្គារ ២៥ មករា ២០២២

ដោយ

យោងតាមព្រឹទ្ធបុរសមហាវិទ្យាល័យវេជ្ជសាស្ត្រ Siriraj Hospital បានលើកឡើងថា ពិភពលោកកំពុងឈានឆ្ពោះទៅរកការបញ្ចប់កូវីដ-១៩ចុងឆ្នាំនេះ ដោយសារតែវីរុសបំប្លែងខ្លួនថ្មី Omicron ឆ្លងរហ័ស ប៉ុន្តែមិនធ្ងន់ធ្ងរ។

លោកសាស្ត្រចារ្យវេជ្ជបណ្ឌិត Prasit Watanapa បាននិយាយនៅថ្ងៃអង្គារ៍នេះថា ការឆ្លងរាលដាលវីរុស Omicron បានធ្វើឲ្យមនុស្សភាគច្រើនរស់រានមានជីវិត និងអភិវឌ្ឍភាពស៊ាំ។

«វីរុស Omicron ដែលឆ្លងយ៉ាងឆាប់រហ័សនឹងជំនួសវីរុសបំប្លែងខ្លួចកាចសាហាវ Delta ហើយចំណុចនេះ យើងកំពុងស្ថិតនៅលើដំណាក់កាលចុងក្រោយនៃជំងឺកូវីដ-១៩»។ លោកមានប្រសាសន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានសង្កត់ធ្ងន់ពីភាពចាំបាច់នៃការចាក់វ៉ាក់សាំងដូសបន្ថែម។ លោកថា ៖«ការចាក់ដូសបន្ថែមបានកាត់បន្ថយការឆ្លង និងការពារមិនឲ្យឈឺធ្ងន់ធ្ងរ បើទោះជាឆ្លង»។

លោកបានផ្តល់ដំបូន្មានថា ការចាក់វ៉ាក់សាំងបង្ការកូវីដពីរដូសមិនគ្រប់គ្រាន់កម្ចាត់វីរុស Omicron ឡើយ ដូច្នេះប្រជាជនត្រូវការដូសបន្ថែមប្រហែលជាបីខែក្រោយ បន្ទាប់ពីចាក់ដូសទី២។

ប្រទេសថៃ មានប្រហែលជា១៥.៨%នៃប្រជាជនដែលបានចាក់ដូសបន្ថែមរួចហើយ។ លោកបានបញ្ជាក់ និងបន្ថែមថា ៖«កូវីដអាចត្រូវបានលុបបំបាត់បាន ប្រសិនបើប្រជាជនទូទាំងពិភពលោកបានចាក់វ៉ាក់សាំងទាំងអស់គ្នា»។

មិនមានភស្តុតាងជាក់លាក់នៅឡើយទេដែលបង្ហាញថា ប្រជាជនត្រូវការចាក់ដូសទី៤ ប៉ុន្តែលោកព្រឹទ្ធបុរសរូបនេះលើកឡើងថា ៖«នឹងមានវ៉ាក់សាំងបង្ការកូវីដជំនាន់ទី២ក្នុងពេលពីរបីខែខាងមុខ ហើយប្រជាជនរង់ចាំមើលប្រសិទ្ធភាពរបស់វា»។

ថៃជាមធ្យមមានករណីឆ្លងកូវីដ-១៩ថ្មីចន្លោះពី៧ទៅ៨ពាន់នាក់ប្រហែលជាមួយសប្តាហ៍ហើយ ខណៈករណីស្លាប់ក៏ក្រោម២០នាក់ដែរ។

លោកសាស្ត្រាចារ្យបានបន្ថែមថា ថ្នាំព្យាបាលកូវីដត្រូវបានប្រើមានប្រសិទ្ធភាពកម្ចាត់វីរុស Omicron។

ជាមួយគ្នានេះ លោកបានព្រមានថា ការប្រែប្រួលអាកាសធាតុសកលអាចនៅតែឲ្យកើតមានវីរុស ឬជំងឺថ្មី៕

ប្រែសម្រួល៖ វីរបុត្រ
ប្រភព៖ bangkokpost