លោក បៃដិន អនុម័តជាផ្លូវការ ឲ្យដាក់ពង្រាយកងទ័ពអាមេរិក រាប់ពាន់នាក់ ទៅអឺរ៉ុប

កាលពីថ្ងៃពុធទី២ខែកុម្ភៈ ប្រធានាធិបតីអាមេរិកលោក ចូ បៃដិន បានអនុម័តជាផ្លូវការ នូវការដាក់ពង្រាយយោធាអាមេរិកបន្ថែមទៀតទៅកាន់តំបន់អឺរ៉ុបខាងកើត ហើយមន្ទីរបញ្ចកោណត្រូវបានគេរំពឹងថានឹងប្រកាសថា កងទ័ពនឹងត្រូវដាក់ពង្រាយនៅក្នុងរយៈពេលប៉ុន្មានថ្ងៃខាងមុខនេះ។

ការដាក់ពង្រាយនេះ គឺបង្ហាញពីការគាំទ្រដល់សម្ព័ន្ធមិត្តអង្គការណាតូ ដែលរងការគំរាមកំហែងដោយចលនាយោធារបស់រុស្ស៊ីនៅជិតប្រទេស អ៊ុយក្រែន។

ប្រភពបានប្រាប់ CNN ថា ការដាក់ពង្រាយនេះ នឹងរួមបញ្ចូលទាហានអាមេរិកប្រហែល២,០០០នាក់ទៅកាន់ប្រទេសប៉ូឡូញ និងពីរបីពាន់នាក់ទៀត ទៅកាន់សមាជិកអង្គការណាតូនៅភាគអាគ្នេយ៍ រួមទាំងប្រទេសរូម៉ានីផងដែរ។

សហរដ្ឋអាមេរិកបានដាក់កងទ័ពចំនួន ៨,៥០០នាក់ស្ថិតក្នុងការប្រុងជើងការខ្ពស់លើទឹកដីរបស់ខ្លួន ក្នុងករណីដែលកងកម្លាំងឆ្លើយតបរបស់អង្គការណាតូត្រូវបានប្រមូលផ្តុំ ហើយកងកម្លាំងរបស់សហរដ្ឋអាមេរិកត្រូវការភ្លាមៗ។

ប៉ុន្តែសហរដ្ឋអាមេរិក និងអង្គការណាតូ មានកងទ័ពរាប់ម៉ឺននាក់ផ្សេងទៀតរួចទៅហើយនៅក្នុងទ្វីបអឺរ៉ុប ដើម្បីត្រៀមដាក់ពង្រាយបន្ថែមទៅកាន់សម្ព័ន្ធមិត្តអឺរ៉ុបខាងកើត។

គួរបញ្ជាក់ថា ការអនុម័តឲ្យដាក់ពង្រាយកងទ័ពអាមេរិកបន្ថែម ដោយលោក បៃដិន បានកើតឡើងមួយថ្ងៃ បន្ទាប់ពីប្រធានាធិបតីរុស្ស៊ីលោក វ្លាឌីមៀរ ពូទីន បានចោទប្រកាន់សហរដ្ឋអាមេរិកថា កំពុងព្យាយាមអូសទាញប្រទេសរបស់លោក ឲ្យធ្លាក់ចូលទៅក្នុងសង្រ្គាមនៅអ៊ុយក្រែន។

លោកបាននិយាយថា គោលដៅរបស់អាមេរិកគឺប្រើប្រាស់ការប្រឈមមុខដាក់គ្នាជាលេសដើម្បីដាក់ទណ្ឌកម្មបន្ថែមទៀតលើប្រទេសរុស្ស៊ី។ លោក​ក៏​បាន​និយាយ​ដែរ​ថា អាមេរិក​មិន​បាន​អើពើ​អំពី​ការ​ព្រួយ​បារម្ភ​របស់​រុស្ស៊ី​ចំពោះ​កងកម្លាំង​សម្ព័ន្ធមិត្ត​ណាតូ​នៅ​អឺរ៉ុបនោះទេ៕

ប្រែសម្រួល៖ Vann Vann

ប្រភព៖ CNN

ចុចអាន៖ ពូទីន លែងនៅស្ងៀម ចេញមុខចោទអាមេរិកថា ព្យាយាមទាញរុស្ស៊ីឲ្យធ្លាក់ចូលសង្គ្រាម