លោក គីម ជុងអ៊ុន អួតថា កូរ៉េខាងជើង មិនទាន់អស់មីស៊ីលបាញ់ទេ (មានវីដេអូ)

ទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូងបានរាយការណ៍ថា មេដឹកនាំកូរ៉េខាងជើងលោក គីម ជុងអ៊ុន និយាយថា ប្រទេសរបស់លោកនឹងបន្តអភិវឌ្ឍមធ្យោបាយវាយលុក និងបាញ់មីស៊ីលបន្ថែមទៀត ។

ថ្លែងជាមួយមន្ត្រី និងអ្នកវិទ្យាសាស្ត្រដែលបានរួមចំណែកដល់ការសាកល្បងបាញ់កាំជ្រួចមីស៊ីលដ៏ជោគជ័យនាពេលថ្មីៗនេះរបស់ទីក្រុងព្យុងយ៉ាង មេដឹកនាំកូរ៉េខាងជើងបាននិយាយនៅថ្ងៃចន្ទនេះថា ប្រទេសរបស់លោកនឹងបន្តសម្រេចបាននូវគោលដៅពង្រឹងសមត្ថភាពការពារជាតិ អភិវឌ្ឍមធ្យោបាយវាយប្រហារដ៏មានឥទ្ធិពលបន្ថែមទៀតដើម្បីធ្វើឲ្យកងទ័ពប្រជាជនរបស់យើងបំពាក់បាននូវសមត្ថភាពទាំងនេះ ។

ទីក្រុងព្យុងយ៉ាងបានបញ្ជាក់ថា ខ្លួនបានធ្វើតេស្តមីស៊ីលផ្លោងអន្តរទ្វីប (ICBM) ថ្មីឈ្មោះ Hwasong-17 កាលពីថ្ងៃទី២៤ ខែមីនា ។ ការបាញ់បង្ហោះកាលពីថ្ងៃព្រហស្បតិ៍នោះគឺជាការសាកល្បងមីស៊ីល ICBM លើកដំបូងរបស់ប្រទេសកូរ៉េខាងជើង ចាប់តាំងពីឆ្នាំ ២០១៧ មក ។ ប្រទេសជប៉ុនបាននិយាយថា ប្រសិនបើទីក្រុងព្យុងយ៉ាងបាញ់មីស៊ីលនេះតាមគន្លងធម្មតានោះ វាអាចហោះបានចម្ងាយ ១៥,០០០ គីឡូម៉ែត្រ ហើយអាចឈានដល់ចំណុចណាមួយនៅលើដែនដីសហរដ្ឋអាមេរិក ។

ទន្ទឹមនោះ វា​ក៏​ជា​ការ​បាញ់​មី​ស៊ី​ល​លើក​ទី ​១១ ​របស់​កូរ៉េ​ខាងជើងផងដែរ​ក្នុង​ឆ្នាំ​នេះ ។ កាលពីថ្ងៃទី ២៧ ខែកុម្ភៈ និងថ្ងៃទី ៥ ខែមីនា កូរ៉េខាងជើងបានបាញ់សាកល្បងមីស៊ីលផ្លោងដែលជាផ្នែកនៃគម្រោងផ្កាយរណបឈ្លបយកការណ៍ ខណៈទីក្រុងសេអ៊ូល និងវ៉ាស៊ីនតោនបានចោទប្រកាន់ទីក្រុងព្យុងយ៉ាងថាបានធ្វើតេស្តមីស៊ីលផ្លោងអន្តរទ្វីប Hwasong-17 ថ្មី ក្រោមលេសនៃការអភិវឌ្ឍន៍ប្រព័ន្ធផ្កាយរណប ។

បន្ទាប់ពីការបាញ់សាកល្បងកាលពីថ្ងៃទី ២៤ ខែមីនា ក្រសួងការបរទេសអាមេរិកបាននិយាយថា រុស្ស៊ី និងចិនគួរតែផ្ញើសារដ៏រឹងមាំមួយទៅកាន់កូរ៉េខាងជើងដើម្បីចៀសវាងការបង្កហេតុបន្ថែម និងចូលរួមក្នុងផ្នែកការទូតប្រកបដោយនិរន្តរភាពផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កូរ៉េខាងជើង បញ្ចេញវីដេអូបាញ់មីស៊ីលអន្តរទ្វីបថ្មី មានទាំង គីម ជុងអ៊ុន អមដំណើរ