អ៊ុយក្រែន ថា ការលុកលុយរបស់ រុស្ស៊ី ធ្វើឲ្យទាហានខ្លួនខ្លាំងបំផុតមួយក្នុង ពិភពលោក

មន្ត្រីអ៊ុយក្រែនម្នាក់កាលពីថ្ងៃពុធបានសរសើរដល់កងទ័ពរបស់ប្រទេសអ៊ុយក្រែនចំពោះសមត្ថភាពរបស់ពួកគេ ក្នុងអំឡុងពេលការលុកលុយរបស់រុស្ស៊ី ។

រដ្ឋមន្ត្រីការបរទេសអ៊ុយក្រែនលោក Dmytro Kuleba បាននិយាយនៅក្នុងបទសម្ភាសន៍ជាមួយទូរទស្សន៍ NBC ថា “ការពិតគឺថា យើងដឹងពីរបៀបប្រយុទ្ធ ហើយយើងមានសមត្ថភាពគ្របគ្រាន់” ។

លោក Kuleba បានបន្តទៀតថា “វានឹងមិនជាការបំផ្លើសទេក្នុងការនិយាយថា អ៊ុយក្រែនបានបង្ហាញឲ្យឃើញថា មានកងទ័ពខ្លាំងបំផុតមួយក្នុងពិភពលោក ហើយប្រហែលជាខ្លាំងបំផុតទី ២ ផងដែរ បន្ទាប់ពីសហរដ្ឋអាមេរិក” ។ យើងមិនមែន​និយាយ​ពី​ចំនួន​ទេ ប៉ុន្តែយើង​និយាយ​ពី​បទពិសោធន៍​ និង​សមត្ថភាព​ប្រយុទ្ធ ។

លោក Kuleba បានបញ្ជាក់នៅក្នុងបទសម្ភាសន៍នោះថា “ប្រសិនបើអ៊ុយក្រែនជាសមាជិកនៃអង្គការណាតូសង្រ្គាមនេះនឹងមិនកើតឡើងនោះទេ ។

លោក Kuleba បាននិយាយថា “ប៉ុន្តែអ្វីដែលយើងត្រូវការបំផុតនោះគឺអាវុធទំនើបគ្រប់ប្រភេទផ្គត់ផ្គង់ដល់ពួកយើង ។ ដូច្នេះយើងស្នើទៅលោកខាងលិច និងទៅណាតូនូវកិច្ចព្រមព្រៀងមួយដោយយុត្តិធម៌ដោយផ្ដល់ឲ្យយើងនូវអ្វីគ្រប់យ៉ាងដែលយើងត្រូវការ” ។

គួរបញ្ជាក់ថា ប្រធានាធិបតីអ៊ុយក្រែនលោក Volodymyr Zelenskyy អស់រយៈពេលជាច្រើនសប្តាហ៍មកហើយនៅតែអំពាវនាវឲ្យអង្គការណាតូ និងបណ្តាប្រទេសលោកខាងលិចដាក់តំបន់គ្មានការហោះហើរលើអ៊ុយក្រែនក្នុងកិច្ចខិតខំប្រឹងប្រែងដើម្បីរារាំងមីស៊ីល និងការវាយប្រហារតាមអាកាសរបស់រុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ លោក Zelensky ថា លោក និងក្រុមការងារធ្វើការនៅទីងងឹត បើហ៊ានបើក ភ្លើងភ្លឺ រុស្ស៊ី នឹងទម្លាក់គ្រាប់បែកមក