អាមេរិក ប្ដូរផែនការលក់អាវុធឲ្យ តៃវ៉ាន់ ព្រោះសម្រុកផលិតទៅជួយ អ៊ុយក្រែន

ក្រសួងការពារជាតិតៃវ៉ាន់និយាយថា សហរដ្ឋអាមេរិកបានជូនដំណឹងពីការផ្លាស់ប្ដូរផែនការផ្តល់ប្រព័ន្ធកាំភ្លើងធំដល់ដែនកោះមួយនេះ ។

កាល​ពី​ខែ​សីហា​ឆ្នាំ​មុន រដ្ឋបាល​អាមេរិក​របស់​លោកប្រធានាធិបតី ចូ បៃដិន បាន​គាំទ្រ​ការ​លក់​អាវុធ​ទៅ​ឲ្យ​តៃវ៉ាន់ ខណៈផែនការនេះរួមមានប្រព័ន្ធកាំភ្លើងធំ Howitzer ចំនួន ៤០ ដើម ក៏ដូចជាប្រព័ន្ធអាវុធផ្សេងទៀតជាដើម ហើយគ្រោងនឹងចែកចាយនៅឆ្នាំ ២០២៥ ។

ទន្ទឹមនោះមន្ត្រីនៅក្រសួងការពារជាតិតៃវ៉ាន់បាននិយាយកាលពីថ្ងៃចន្ទថា ប៉ុន្តែថ្មីៗនេះសហរដ្ឋអាមេរិកបានប្រាប់កោះតៃវ៉ាន់ថា ការចែកចាយបែរជានឹងធ្វើឡើងបន្ទាប់ពីឆ្នាំ ២០២៦ ទៅវិញ ដោយសារតែខ្សែសង្វាក់ផលិតកម្មមានភាពតានតឹង ។

ស្របពេលជាមួយគ្នានេះ វាមិនច្បាស់ទេថាហេតុអ្វីបានជាខ្សែសង្វាក់ផលិតកម្មមានភាពតឹងតែង ប៉ុន្តែប្រព័ន្ធផ្សព្វផ្សាយរបស់តៃវ៉ាន់មួយចំនួន រួមទាំងសារព័ត៌មាន United Daily News បានរាយការណ៍ថា អាមេរិកកំពុងសម្រុកផលិតអាវុធទៅឲ្យទីក្រុងកៀវទើបធ្វើឲ្យសមត្ថភាពផលិតអាវុធរបស់អាមេរិករងផលប៉ះពាល់ បន្ទាប់ពីសង្គ្រាមលុកលុយរបស់រុស្ស៊ីលើអ៊ុយក្រែន ។

ចំណែកសារព័ត៌មានផ្សេងទៀតបានដាក់ការសង្ស័យថា រដ្ឋបាលលោក បៃដិន ប្រហែលជាបានជ្រើសរើសការលក់សព្វាវុធដែលសមស្របជាងនេះ ដោយមើលឃើញពីភាពខុសគ្នានៃអំណាចយោធារវាងតៃវ៉ាន់ និងចិន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជំទាវទីមួយ អាមេរិក នឹងធ្វើដំណើរទៅកាន់ប្រទេសណាតូចំនួន ២ ដើម្បីគាំទ្រជនភៀសខ្លួន អ៊ុយក្រែន