Connect with us

ព័ត៌មានអន្ដរជាតិ

មេទ័ពបង្ហាត់បង្រៀនការងារលោក គីម ជុងអ៊ុន ទទួលមរណភាពហើយ

បានផុស

នៅ

ប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាងបានរាយការណ៍នៅថ្ងៃសុក្រនេះថា មន្ត្រីយោធាកំពូលកូរ៉េខាងជើងម្នាក់ដែលជាជំនួយការជិតស្និទ្ធរបស់មេដឹកនាំកំពូលលោក គីម ជុងអ៊ីល និងជាអ្នកជួយបង្ហាត់បង្រៀនការងារដល់មេដឹកនាំបច្ចុប្បន្នលោក គីម ជុងអ៊ុន បានទទួលមរណភាពហើយ ។

លោក គីម ជុងអ៊ុន (ឆ្វេង) និងលោក Hyon Chol-hae
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានកណ្ដាលកូរ៉េ (KCNA) បាននិយាយថា លោក Hyon Chol-hae សេនាប្រមុខនៃកងទ័ពប្រជាជនកូរ៉េ និងជាទីប្រឹក្សាទូទៅនៃក្រសួងការពារជាតិបានទទួលមរណភាព ដោយសារជំងឺសរីរាង្គជាច្រើននៅម៉ោង ៩ ព្រឹកថ្ងៃព្រហស្បតិ៍ ក្នុងវ័យ ៨៧ ឆ្នាំ ។

ទន្ទឹមនោះ កូរ៉េខាងជើងក៏បានរៀបចំគណៈកម្មាធិការជាតិរៀបចំបុណ្យសពដែលដឹកនាំដោយលោក គីម ជុងអ៊ុន និងមានការចូលរួមដោយមន្ត្រីជាន់ខ្ពស់មួយចំនួនផ្សេងទៀត ដោយដាក់សពអ្នកស្លាប់នៅឯមហោស្រពវប្បធម៌ April 25 ក្នុងទីក្រុងព្យុងយ៉ាង ។

លោក Hyon Chol-hae ជាឥស្សរជនសំខាន់នៅក្នុងបក្សពលករដែលកំពុងកាន់អំណាចផងដែរ ដោយបានបម្រើការជាសមាជិកការិយាល័យនយោបាយ និងគណៈកម្មាធិការមជ្ឈិម ក៏ដូចជាគណៈកម្មាការយោធាមជ្ឈិមផងដែរ ។

ទន្ទឹមនោះលោកក៏ជាមេដឹកនាំយោធាដ៏មានឥទ្ធិពលបំផុតមួយរូបក្នុងអំឡុងការដឹកនាំរបស់អតីតមេដឹកនាំលោក គីម ជុងអ៊ីល ដែលជួយគាត់យ៉ាងដិតដល់ក្នុងការរឹតបន្តឹងការក្ដោបក្តាប់លើយោធារបស់គាត់ ។

អ្វីដែលសំខាន់នោះលោក Hyon Chol-hae ក៏បានដើរតួក្នុងការស្នងអំណាចពីឪពុកទៅកូននៅក្នុងរបបកាលពីមួយទសវត្សរ៍មុន ហើយក្រោយមកលោក​ត្រូវ​បាន​ដំឡើង​ឋានន្តរស័ក្តិ​ជា​មេទ័ព​នៅ​ឆ្នាំ​ ២០១៦ ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ កូរ៉េខាងជើង រកឃើញព្រឹត្តិការណ៍ផ្ទុះឆ្លងកូវីដយ៉ាងធំសម្បើមបែបនេះ (មានវីដេអូ)

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម