លោក ត្រាំ ផ្លែផ្កាថា អាមេរិក មានប្រាក់រាប់ពាន់លានដុល្លារឲ្យ អ៊ុយក្រែន តែមិនបានបង្កើនសន្តិសុខសម្រាប់ក្មេងៗក្នុងប្រទេស (មានវីដេអូ)

អតីតប្រធានាធិបតីអាមេរិកលោក ដូណាល់ ត្រាំ បានហៅការបាញ់ប្រហារដ៏សាហាវនៅសាលាបឋមសិក្សាមួយក្នុងទីក្រុង Uvalde រដ្ឋតិចសាស់ ថាជា “អំពើឃោរឃៅ សាហាវ និងព្រៃផ្សៃ” ដែលធ្វើឲ្យរូបលោកផ្ទាល់មានការភ្ញាក់ផ្អើលយ៉ាងខ្លាំង ។

ពាក់ព័ន្ធនឹងបញ្ហានេះដែរ លោក ត្រាំ បាននិយាយក្នុងអំឡុងពេលសន្និបាតសមាគមកាំភ្លើងជាតិ (NRA) ថា “សហរដ្ឋអាមេរិកមានប្រាក់រហូតដល់ ៤០ ពាន់លានដុល្លារឲ្យទៅអ៊ុយក្រែន ប៉ុន្តែមិនអាចធ្វើអ្វីគ្រប់យ៉ាង ឬការពារឲ្យកូនរបស់យើងមានសុវត្ថិភាពនៅផ្ទះនោះទេ” ។

លោក ត្រាំ បាននិយាយសំដៅទៅកញ្ចប់ជំនួយដែលចុះហត្ថលេខាដោយលោកប្រធានាធិបតី ចូ បៃដិន ថា សហរដ្ឋអាមេរិកបានចំណាយប្រាក់រាប់ពាន់លានដុល្លារនៅក្នុងប្រទេសអ៊ីរ៉ាក់ និងអាហ្វហ្គានីស្ថាន ដោយមិនមានអ្វីតបស្នង ។

លោកបានបន្ថែមថា សហរដ្ឋអាមេរិកគួរតែវិនិយោគលើការបង្កើនសន្តិសុខនៅតាមសាលារៀនក្នុងប្រទេសសិន មុនពេលដែលខ្លួនពិចារណាការកសាងប្រទេសជុំវិញពិភពលោក ។

ជាចុងក្រោយលោក ត្រាំ បាននិយាយថា “អ្នករស់នៅក្នុងទីក្រុង Uvalde ដឹងទាំងអស់អំពីរឿងបាញ់ប្រហារនេះ ។ ឃាតកម្មដ៏គួរឲ្យភ័យខ្លាចលើកុមារស្លូតត្រង់ ១៩ នាក់ និងគ្រូបង្រៀនពេញវ័យ ២ នាក់ និងអ្នករបួសជាច្រើននាក់ គឺជាអំពើឃោរឃៅ និងព្រៃផ្សៃ ដែលធ្វើឲ្យសតិសម្បជញ្ញៈរបស់ជនជាតិអាមេរិកគ្រប់រូបមានការភ្ញាក់ផ្អើលយ៉ាងខ្លាំង” ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក ត្រាំ ថា អាមេរិក នឹងមិនជួយការពារអង្គការណាតូទេ