អំពើពុករលួយក្នុងជួរកងទ័ពអ៊ុយក្រែន! ទាហានលក់ជំនួយយោធាលោកខាងលិច ដើម្បីប្រាក់ 

នាយកការិយាល័យសន្តិសុខសេដ្ឋកិច្ចអ៊ុយក្រែន លោក Vadym Melnyk បាននិយាយកាលពីថ្ងៃអង្គារទី០៥ខែកក្កដាថា មានករណីជាច្រើន ដែលជំនួយមនុស្សធម៌ និងឧបករណ៍យោធាលោកខាងលិច ត្រូវបានលក់នៅក្នុងប្រទេសអ៊ុយក្រែន។

លោក Melnyk បានប្រាប់ទូរទស្សន៍ Ukraina 24 ថា “សូម្បីតែផលិតផលយោធា ក៏ត្រូវបានលក់ដើម្បីប្រាក់ដែរ។ យើងបានរកឃើញការពិតទាំងនេះ”។

មន្ត្រីរូបនេះបានបន្ថែមថា ការិយាល័យកំពុងស៊ើបអង្កេតករណីពាក់ព័ន្ធនឹងជំនួយមនុស្សធម៌ ថ្វីបើវាត្រូវបានលក់ដើម្បីប្រាក់ក៏ដោយ។

សូម្បីតែទាហានស៊ីឈ្នួលអាមេរិកម្នាក់ ដែលបានប្រយុទ្ធដើម្បីអ៊ុយក្រែន និងត្រូវបានចាប់ខ្លួនដោយទាហានរុស្ស៊ីកាលពីខែមុន ក៏បាននិយាយដែរថា គាត់ផ្ទាល់ បានមើលឃើញអំពើពុករលួយនៅក្នុងយោធាអ៊ុយក្រែន។

ព័ត៌មាននេះលេចឡើងស្របពេល ប្រទេសរុស្ស៊ី បានអះអាងថា អាវុធមួយចំនួនដែលលោកខាងលិចបញ្ជូនទៅឲ្យអ៊ុយក្រែន កំពុងធ្លាយទៅដល់ពាសពេញតំបន់មជ្ឈិមបូព៌ា និងធ្លាក់ចូលទៅក្នុងទីផ្សារងងឹត។

ថ្លែងនៅក្នុងសុន្ទរកថាតាមទូរទស្សន៍ រដ្ឋមន្ត្រីការពារជាតិលោក Sergei Shoigu បាននិយាយថា កន្លងមក អ៊ុយក្រែនបានទទួលទំនិញយោធាជាង ២៨ ០០០តោន ហើយសព្វាវុធរបស់លោកខាងលិចមួយចំនួន កំពុងលេចឡើងនៅមជ្ឈិមបូព៌ា។

ទោះបីជាយ៉ាងណាក៏ដោយ លោក​មិន​បាន​ផ្តល់​ព័ត៌មាន​លម្អិត​ណា​មួយ ​ដើម្បីគាំទ្រ​ការ​អះអាង​របស់ខ្លួន​ទេ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ អាវុធលោកខាងលិចផ្តល់ឲ្យអ៊ុយក្រែន ធ្លាយទៅដល់មជ្ឈិមបូព៌ា ធ្លាក់ចូលទីផ្សារងងឹត