ព័ត៌មានអន្ដរជាតិ

អាមេរិក ថា សមយុទ្ធយោធាចុងក្រោយរបស់ ចិន លើកោះតៃវ៉ាន់ជា “ប្រតិកម្មហួសហេតុ”

បានផុស

៤ សប្តាហ៍ មុន

នៅ

ថ្ងៃអង្គារ ១៦ សីហា ២០២២

ដោយ

អ្នកនាំពាក្យក្រសួងការបរទេសអាមេរិកបានចោទប្រទេសចិនថាកំពុងប្រតិកម្មហួសហេតុខ្លាំងពេក ពាក់ព័ន្ធនឹងដំណើរទស្សនកិច្ចទៅតៃវ៉ាន់របស់គណៈប្រតិភូសភាអាមេរិកកាលពីពេលថ្មីៗនេះ ជាពិសេសការធ្វើសមយុទ្ធយោធាចុងក្រោយនៅជុំវិញកោះនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាចិនកាលពីថ្ងៃចន្ទនិយាយថា បានធ្វើសមយុទ្ធនៅជុំវិញកោះតៃវ៉ាន់ដែលជាវិធានការប្រឆាំងនឹងដំណើរទស្សនកិច្ចរបស់ក្រុមសមាជិកសភាអាមេរិកដែលមានសមាជិក ៥ នាក់ដឹកនាំដោយសមាជិកព្រឹទ្ធសភារដ្ឋ Massachusetts មកពីគណបក្សប្រជាធិបតេយ្យគឺលោក Ed Markey ដែលមកដល់កោះតៃវ៉ាន់កាលពីថ្ងៃអាទិត្យ ។

អ្នកនាំពាក្យក្រសួងការបរទេសអាមេរិកលោក Ned Price បាននិយាយកាលពីថ្ងៃចន្ទថា “ការឆ្លើយតបណាមួយចំពោះដំណើរទស្សនកិច្ចដោយសន្តិវិធីរបស់សមាជិកសភាអាមេរិក ក៏ដូចជាការឆ្លើយតបណាមួយដែលរួមបញ្ចូលនូវវោហាសាស្ត្រ ឬសមយុទ្ធយោធា ឬសកម្មភាពបង្កហេតុទាំងនោះគឺមិនចាំបាច់នោះទេ ហើយវាជាប្រតិកម្មហួសហេតុទាំងស្រុង” ។

លោក Price បាននិយាយថា គណៈប្រតិភូសភាអាមេរិកបានទៅធ្វើទស្សនកិច្ចនៅតៃវ៉ាន់ជាច្រើនទសវត្សរ៍មកហើយ ។ លោកបានចោទក្រុងប៉េកាំងថាបានទាញយកប្រយោជន៍ពីដំណើរទស្សនកិច្ចចុងក្រោយនេះ ខណៈដែលខ្លួនព្យាយាមផ្លាស់ប្តូរស្ថានភាពនៅទូទាំងច្រកសមុទ្រតៃវ៉ាន់ ។

គួរបញ្ជាក់ថា ដំណើរទស្សនកិច្ចនេះកើតមានឡើងមិនដល់ ២ សប្តាហ៍ផង បន្ទាប់ពីប្រធានសភាសហរដ្ឋអាមេរិកលោកស្រី Nancy Pelosi បានធ្វើទស្សនកិច្ចនៅកោះតៃវ៉ាន់ ហើយចិនបានឆ្លើយតបភ្លាមៗដោយធ្វើសមយុទ្ធផ្លូវអាកាស និងដែនសមុទ្រទ្រង់ទ្រាយធំជុំវិញកោះនេះ ៕