រុស្ស៊ី ប្រកាសក្តែងៗ មិនមេត្តា ចំពោះអ្នកសម្លាប់ Darya Dugina (មានវីដេអូ)

ការសម្លាប់អ្នកវិភាគនយោបាយ និងអ្នកកាសែត Darya Dugina គឺជាឧក្រិដ្ឋកម្មដ៏ព្រៃផ្សៃ មិនអាចមានក្តីមេត្តាចំពោះមេខ្លោង និងជនល្មើសឡើយ។ នេះបើតាមសម្តីរដ្ឋមន្ត្រីការបរទេសរុស្ស៊ី លោក Sergey Lavrov ក្នុងសន្និសីទសារព័ត៌មានកាលពីថ្ងៃអង្គារទី២៣ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជា​ការ​ឆ្លើយ​តបទៅ​នឹង​សំណួរ រដ្ឋមន្ត្រី​រូប​នេះ​បាន​និយាយ​ថា “​ខ្ញុំ​មិន​អាច​វិនិច្ឆ័យបានទេ​ថាតើ ​វា​ជា​ទង្វើ​នៃ​ការ​បំភិត​បំភ័យ​ឬ​ការ​ដោះស្រាយ​គណនី​។ តែ​នេះ​ជា​អំពើឧក្រិដ្ឋកម្មដ៏​ព្រៃផ្សៃ​ដែល​មិន​អាច​លើកលែង​ទោស​ឲ្យបាន​”។

លោក Lavrov បន្ថែមថា “ឥឡូវនេះ តាមខ្ញុំយល់ សេវាសន្តិសុខសហព័ន្ធ (FSB) បានរកឃើញអង្គហេតុរួចហើយ។ ការស៊ើបអង្កេតនេះ ខ្ញុំសង្ឃឹមថា នឹងបញ្ចប់យ៉ាងឆាប់រហ័ស ហើយផ្អែកលើលទ្ធផលនៃការស៊ើបអង្កេតនេះ ប្រាកដជាគ្មានក្តីមេត្តាចំពោះមេខ្លោង អ្នកដែលបញ្ជា និងជនល្មើសឡើយ”។

គួរបញ្ជាក់ជាថ្មី, កាលពីថ្ងៃទី២០ ខែសីហា គ្រឿងផ្ទុះបានកម្ទេចរថយន្ត Toyota Land Cruiser ដែល Dugina កំពុងបើកបរលើផ្លូវហាយវេ ក្បែរភូមិ Bolshiye Vyazyomy ក្នុងទីក្រុងមូស្គូ។ រថយន្តបានឆាបឆេះ បណ្តាលឲ្យនាងស្លាប់ភ្លាមៗ។

FSB បានប្រាប់ TASS កាលពីថ្ងៃចន្ទថា ឃាតកម្មរបស់ Dugina ត្រូវបានដោះស្រាយ។ យោងតាមទីភ្នាក់ងារសហព័ន្ធ, ករណីនេះត្រូវបានរៀបចំដោយសេវាសម្ងាត់អ៊ុយក្រែន និងអនុវត្តដោយជនជាតិអ៊ុយក្រែនឈ្មោះ Natalia Vovk ដែលបានភៀសខ្លួនទៅប្រទេសអេស្តូនីបន្ទាប់ពីការសម្លាប់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS

ចុចអាន៖ រុស្ស៊ី បង្ហាញមុខជនសង្ស័យ ក្នុងករណីធ្វើឃាត កូនស្រីសម្ព័ន្ធមិត្ត លោក ពូទីន (មានវីដេអូ)