សម្ដេចប៉ាប Francis ៖ ជម្លោះ រុស្ស៊ី-អ៊ុយក្រែន គឺជា “សង្គ្រាមលោក”

អំឡុងពេលយាងទៅកាន់ប្រទេសកាហ្សាក់ស្ថានកាលពីពេលថ្មីៗនេះ សម្តេចប៉ាប Francis មានបន្ទូលថា វាជាកំហុសមួយក្នុងការហៅជម្លោះនៅអ៊ុយក្រែនថាជា “សង្គ្រាមរុស្ស៊ី-អ៊ុយក្រែន” ប៉ុន្តែតាមការពិតវាគឺជា “សង្រ្គាមលោក” ។

សម្តេចប៉ាបមានបន្ទូលប្រាប់កាសែតអ៊ីតាលី La Civilta Cattolica ថា “មានសង្រ្គាមកំពុងកើតឡើង ហើយខ្ញុំគិតថា វាជារឿងខុសឆ្គងដែលគិតថា វាជាខ្សែភាពយន្តខូវប៊យដែលមានសភាវៈល្អ និងសភាវៈអាក្រក់ ។ វាក៏ជាកំហុសផងដែរក្នុងការគិតថា នេះជាសង្រ្គាមរវាងរុស្ស៊ី-អ៊ុយក្រែន ផ្ទុយទៅវិញវាគឺ​ជា​សង្គ្រាម​លោក”​ ។

មេដឹកនាំនៃសាសនាកាតូលិក និងជាប្រធានបុរីវ៉ាទីកង់ក៏បាន​កត់សម្គាល់​ផងដែរ​ថា ដំណើរ​ទស្សនកិច្ច​ទៅកាន់​ប្រទេស​អ៊ុយ​ក្រែ​ន​ដែលសម្ដេច​បាន​ប្រកាស​ពីមុនមក ​នឹង​អាច​ធ្វើ​ទៅបានដើម្បីសម្របសម្រួលនៅក្នុង​របៀបវារៈ​សន្តិភាពនៅ​ដំណាក់កាលបច្ចុប្បន្ន​នេះ​ ។

សម្តេច​ប៉ាប Francis ក៏​មានបន្ទូលដែរ​ថា ​នៅប្រទេស​កាហ្សាក់ស្ថាន មានជនជាតិ​អ៊ុយក្រែនមួយចំនួនមក​រក​សម្ដេច ហើយម្នាក់ក្នុងចំណោមពួកគេ គឺជាមន្ត្រីយោធាដែលទទួលខុសត្រូវចំពោះការដោះដូរអ្នកទោសរវាងរុស្ស៊ី និងអ៊ុយក្រែនដែលប្រកាសដោយលោកប្រធានាធិបតីអ៊ុយក្រែន Volodymyr Zelensky ។

ក្រោយមកមន្ត្រីយោធារូបនោះបានសួរសម្ដេចថាតើយើងអាចធ្វើការដោះដូរ ឬផ្ដល់បញ្ជីឈ្មោះអ្នកទោសចំនួន ៣០០ នាក់ជូនសម្ដេចបានទេ? ។ ពេលនោះសម្តេចប៉ាបមានបន្ទូលតបថា “ព្រះអង្គផ្ទាល់ក៏បានបញ្ជូនរឿងរ៉ាវនេះដោយផ្ទាល់ទៅកាន់ឯកអគ្គរដ្ឋទូតរុស្ស៊ីផងដែរ និងកំពុងរង់ចាំចម្លើយដូចគ្នា” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ RT ផ្សាយថា អាមេរិក និងអឺរ៉ុប កំពុងអស់អាវុធឲ្យ អ៊ុយក្រែន ហើយ