តៃវ៉ាន់ ថា ចិន បញ្ជូនយន្តហោះ និងនាវាចម្បាំង ២៦ គ្រឿងមកកាន់ច្រក​សមុទ្រតៃវ៉ាន់

ក្រសួងការពារជាតិតៃវ៉ាន់បាននិយាយកាលពីថ្ងៃអាទិត្យថា កងកម្លាំងប្រដាប់អាវុធរបស់កោះតៃវ៉ាន់បានមើលឃើញយន្តហោះចំនួន ២២ គ្រឿង និងនាវាចម្បាំងចំនួន ៤ គ្រឿងរបស់កងទ័ពរំដោះប្រជាជនចិន (PLA) ចូលទៅជិតកោះដែលគ្រប់គ្រងដោយតៃវ៉ាន់ ។

ក្រសួងបាននិយាយនៅលើបណ្ដាញ Twitter ថា “យន្តហោះចំនួន ៨ ក្នុងចំណោមយន្តហោះ ២២ គ្រឿងបានហោះឆ្លងកាត់ “បន្ទាត់មធ្យម” នៃច្រកសមុទ្រតៃវ៉ាន់ ដែលបម្រើជាព្រំដែនសមុទ្រមិនផ្លូវការរវាងកោះតៃវ៉ាន់ និងចិនដីគោក ។ យន្តហោះទាំងនេះរួមមានយន្តហោះចម្បាំង J-11 និងយន្តហោះចម្បាំង J-16 ចំនួន ២ គ្រឿង យន្តហោះគ្មានមនុស្សបើក BZK-005 និង CH-4 ក៏ដូចជាយន្តហោះចម្បាំងអេឡិចត្រូនិច Y-8 និង Y-9 ផងដែរ ។

ក្រសួងបានបន្ថែមថា យោធាតៃវ៉ាន់បានតាមដានស្ថានភាព និងឆ្លើយតបដោយការបញ្ជូនយន្តហោះល្បាតអាកាសស៊ីវិល ចេញការព្រមានតាមវិទ្យុ និងការដាក់ពង្រាយប្រព័ន្ធមីស៊ីលការពារដែនអាកាសជាដើម ។

ស្ថានការណ៍ជុំវិញកោះតៃវ៉ាន់បានកើនឡើង បន្ទាប់ពីប្រធានសភាអាមេរិកលោកស្រី Nancy Pelosi បានទៅទស្សនាកោះនេះកាលពីដើមខែសីហា ។

ស្របពេលជាមួយគ្នានេះ ប្រទេសចិនបានថ្កោលទោសដំណើររបស់លោកស្រី Pelosi ដោយទីក្រុងប៉េកាំងចាត់ទុកថាជាកាយវិការនេះជាការគាំទ្រចំពោះការបំបែកខ្លួន ហើយបានចាប់ផ្តើមសមយុទ្ធយោធាទ្រង់ទ្រាយធំនៅតំបន់ជុំវិញកោះនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក គីម ជុងអ៊ុន គាំទ្រ ចិន លើការបង្រួបបង្រួម តៃវ៉ាន់