កាលពីថ្ងៃអង្គារទី០៤ខែតុលា រដ្ឋបាលក្រុងបាងកក (BMA) បានស្នើឲ្យបុគ្គលិកក្រុមហ៊ុនឯកជន ធ្វើការពីផ្ទះ ដើម្បីបញ្ចៀសការកកស្ទះចរាចរណ៍ ខណៈភ្លៀងធ្លាក់ខ្លាំងត្រូវបានព្យាករ នឹងធ្លាក់ ទូទាំងរាជធានីចាប់ពីថ្ងៃពុធដល់ថ្ងៃសុក្រ។

អ្នកបើកបរយានយន្ត បានជួបប្រទះនឹងការកកស្ទះយ៉ាងយូរកាលពីថ្ងៃចន្ទ នៅពេលភ្លៀងធ្លាក់ ពេលរសៀល បានបណ្តាលឲ្យមានទឹកជំនន់ រហូតដល់ពេលល្ងាច។

អភិបាលរងក្រុងបាងកក លោកស្រី Tavida Kamolvej បាននិយាយថា “ហេតុនេះហើយ BMA បានស្នើឲ្យបុគ្គលិកក្រុមហ៊ុនឯកជន ធ្វើការពីផ្ទះរហូតដល់ថ្ងៃសុក្រ។ សម្រាប់អ្នកដែលធ្វើការនៅនឹងកន្លែង និយោជកត្រូវបានស្នើសុំ អនុញ្ញាតឲ្យពួកគេចេញពីធ្វើការមុនម៉ោង ដើម្បីចៀសវាងការកកស្ទះ ក្នុងអំឡុងពេលមានស្ថានភាពមិនល្អ”។

លោកស្រី Tavida បានទទួលស្គាល់ថា ការរំដោះទឹកមានភាពយឺតយ៉ាវ ទោះបីជាតំបន់លិចទឹកភាគច្រើននៅក្នុងទីក្រុង ត្រូវបានសម្អាតកាលពីថ្ងៃអង្គារក៏ដោយ។

យោងតាមនាយកដ្ឋានឧតុនិយមថៃ, ភ្លៀងធ្លាក់នៅតំបន់ខាងលើនៃភាគខាងជើង និងឦសាននឹងថមថយនៅត្រឹមថ្ងៃអាទិត្យចុងសប្តាហ៍នេះ ថ្វីបើតំបន់កណ្តាល បូព៌ា ភាគខាងត្បូង និងទីក្រុងបាងកក និងខេត្តជុំវិញ ប្រហែលជានៅតែជួបប្រទះភ្លៀងធ្លាក់ខ្លាំងក៏ដោយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ប្រកាសបើកទំនប់ និងព្រមានហានិភ័យគ្រោះទឹកជំនន់ចំពោះខេត្តចំនួន៥ រួមទាំងទីក្រុង បាងកក