ពូទីន ព្រមាន៖ បើ អ៊ុយក្រែន វាយប្រហារបន្ថែមទៀត រុស្ស៊ី នឹងឆ្លើយតប ធ្ងន់ធ្ងរបំផុត (មានវីដេអូ)

កាលពីថ្ងៃចន្ទទី១០ខែតុលា លោកប្រធានាធិបតី វ្ល៉ាឌីមៀរ ពូទីន បាននិយាយថា ការឆ្លើយតបរបស់រុស្ស៊ី ចំពោះការវាយប្រហារបន្ថែមទៀតរបស់អ៊ុយក្រែន នឹងមានលក្ខណៈធ្ងន់ធ្ងរបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានព្រមានបែបនេះ បន្ទាប់ពីកងកម្លាំងរបស់ទីក្រុងមូស្គូ បើកការវាយប្រហារដោយមីស៊ីលសងសឹក ទូទាំងទីក្រុងជាច្រើនរបស់អ៊ុយក្រែន ក្រោយការផ្ទុះនៅលើស្ពានតភ្ជាប់តំបន់គ្រីមៀជាមួយ រុស្ស៊ី។

នៅពេលចាប់ផ្តើមកិច្ចប្រជុំក្រុមប្រឹក្សាសន្តិសុខរុស្ស៊ី លោក ពូទីន និយាយថា “វាមិនអាចទៅរួចទេ ក្នុងការទុកឲ្យការវាយប្រហាររបស់អ៊ុយក្រែនកន្លងផុតទៅ ដោយគ្មានចម្លើយ។ ប្រសិនបើការប៉ុនប៉ងវាយប្រហារភេរវកម្មនៅតែបន្ត ការឆ្លើយតបពីរុស្ស៊ីនឹងធ្ងន់ធ្ងរបំផុត ហើយឈានដល់កម្រិតនៃការគំរាមកំហែង។ រឿងនេះ គ្មានអ្វីត្រូវសង្ស័យឡើយ”។

ការលើកឡើងរបស់លោក ពូទីន ធ្វើឡើង បន្ទាប់ពីការបំផ្ទុះកាលពីថ្ងៃសៅរ៍ទី០៨ខែតុលា បានបំផ្លាញស្ពានដ៏ធំមួយនៅតំបន់គ្រីមៀ។

ជាការឆ្លើយតបទៅនឹងការវាយប្រហារនោះ លោកពូទីន និយាយថា រុស្ស៊ីបានបើកការវាយប្រហារទ្រង់ទ្រាយធំជាមួយនឹងអាវុធចម្ងាយឆ្ងាយដែលមានភាពជាក់លាក់ខ្ពស់ ទៅលើរោងចក្រថាមពល ប៉ុស្តិបញ្ជាការយោធា និងទីតាំងទំនាក់ទំនងក្នុងប្រទេសអ៊ុយក្រែន។

ស្របពេលជាមួយគ្នានោះដែរ ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយថា ការវាយប្រហារជាបន្តបន្ទាប់ បានសម្រេចគោលបំណងរបស់ពួកគេ។ គោលដៅ​ទាំង​អស់​ត្រូវ​បាន​វាយ​លុក។

លោកពូទីនក៏បានចោទប្រកាន់អ៊ុយក្រែនដែរថា បានបើកការវាយប្រហារចំនួនបីលើក លើរោងចក្រថាមពលនុយក្លេអ៊ែរ Kursk ក្នុងប្រទេសរុស្ស៊ី ដែលមានចម្ងាយប្រហែល ៨៥ គីឡូម៉ែត្រពីព្រំដែនអ៊ុយក្រែន និងពីការប៉ុនប៉ងវាយប្រហារបំពង់បង្ហូរឧស្ម័ន TurkStream ដែលភ្ជាប់ពីប្រទេសរុស្ស៊ីទៅ តួកគី នៅក្រោមសមុទ្រខ្មៅ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera

ចុចអាន៖ ទាហាន បេឡារុស និង រុស្ស៊ី ប្រកាសពួតដៃគ្នា