ប្អូនស្រីលោក គីម ជុងអ៊ុន ស្តីឲ្យប្រធានាធិបតីកូរ៉េខាងត្បូង ថាជា “មនុស្សល្ងីល្ងើ”

ប្អូនស្រីរបស់មេដឹកនាំកូរ៉េខាងជើង គីម ជុងអ៊ុន បានរិះគន់រដ្ឋាភិបាលកូរ៉េខាងត្បូង ប៉ុន្មានថ្ងៃបន្ទាប់ពីទីក្រុងសេអ៊ូលនិយាយថា ខ្លួនកំពុងពិចារណាលើការដាក់ទណ្ឌកម្មថ្មីជុំវិញការសាកល្បងមីស៊ីលនាពេលថ្មីៗរបស់ទីក្រុងព្យុងយ៉ាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាញ់សាកល្បងមីស៊ីលមិនដកដៃកាលពីដើមខែនេះ រួមមានទាំងការបាញ់មីស៊ីលអន្តរទ្វីបដែលបានហោះដល់ដីគោករបស់សហរដ្ឋអាមេរិកទាំងមូលផងដែរ។

ស្របពេលជាមួយគ្នានោះ ទីក្រុងសេអ៊ូលក៏កំពុងពិចារណាចាត់វិធានការប្រឆាំងនឹងការវាយប្រហារតាមអ៊ីនធឺណិតពីសំណាក់កូរ៉េខាងជើងផងដែរ ដែលត្រូវបានគេជឿថាជាប្រភពថវិកាថ្មីដ៏សំខាន់សម្រាប់កម្មវិធីអាវុធរបស់ខ្លួន ប្រសិនបើរដ្ឋមួយនេះធ្វើការបង្កហេតុធំៗ ដូចជាការសាកល្បងនុយក្លេអ៊ែរជាដើម។

លោកស្រី Kim Yo Jong បានហៅប្រធានាធិបតីអភិរក្សនិយមកូរ៉េខាងត្បូង Yoon Suk Yeol និងរដ្ឋបាលរបស់គាត់ថាជា “ជាមនុស្សល្ងីល្ងើដែលបន្តបង្កើតស្ថានការណ៍គ្រោះថ្នាក់”។

លោកស្រីបានបន្តព្រមានដល់ជនទុច្ចរិត និងឆោតល្ងង់ដោយនិយាយថា “ការដាក់ទណ្ឌកម្ម និងសម្ពាធដ៏អស់សង្ឃឹមរបស់សហរដ្ឋអាមេរិក និងឧបាយកលរបស់កូរ៉េខាងត្បូងប្រឆាំងកូរ៉េខាងជើង នឹងបង្កើនអរិភាព និងកំហឹងរបស់អ្នកក្រោយ”។

ឆ្លើយតបទៅនឹងការប្រមាថរបស់លោកស្រី Kim ទីក្រុងសេអ៊ូលនិយាយថា វាជារឿងគួរឲ្យសោកស្តាយបំផុតសម្រាប់លោកស្រី ដែលបរិហារប្រមុខរដ្ឋរបស់យើងដោយពាក្យសម្តីមិនសមរម្យ និងគ្មានក្រមសីលធម៌។

ក្រសួងបង្រួបបង្រួម ដែលជានាយកដ្ឋានប្រតិបត្តិនៃរដ្ឋាភិបាលកូរ៉េខាងត្បូងបានបន្ថែមថា ខ្លួនសូមថ្កោលទោសយ៉ាងខ្លាំងចំពោះអ្វីដែលខ្លួនហៅថាជា ការប៉ុនប៉ងរបស់លោកស្រី Kim ក្នុងការញុះញង់ឲ្យមានការតស៊ូប្រឆាំងរដ្ឋាភិបាល និងធ្វើឲ្យប្រព័ន្ធរង្គោះរង្គើ៕

ប្រែសម្រួល៖ Vann Vann

ប្រភព៖ SKY

ចុចអាន៖ ប្អូនស្រីលោក គីម ជុងអ៊ុន ថ្កោលទោសកិច្ចប្រជុំ UNSC លើការបាញ់មីស៊ីល របស់ កូរ៉េខាងជើង