ផ្ទុះភ្នំភ្លើងខ្ពស់បំផុតនៅ ឥណ្ឌូណេស៊ី អាចបង្កឲ្យមានរលកយក្សស៊ូណាមិ

ទីភ្នាក់ងារឧតុនិយមជប៉ុនបាននិយាយថា ភ្នំភ្លើងខ្ពស់បំផុតមួយបានផ្ទុះឡើងនៅកោះ Java ប្រទេសឥណ្ឌូណេស៊ីនៅថ្ងៃអាទិត្យនេះ ខណៈការគំរាមកំហែងពីរលកយក្សស៊ូណាមិកំពុងត្រូវបានតាមដានយ៉ាងដិតដល់ផងដែរ ។

បច្ចុប្បន្ន ទីភ្នាក់ងារនេះក៏កំពុងពិនិត្យមើលលទ្ធភាពនៃការផ្ទុះបន្ថែមទៀតរបស់ភ្នំភ្លើង Semeru ជាពិសេសគឺការបង្កឲ្យមានរលកយក្សស៊ូណាមិ ដែលអាចវាយប្រហារផ្នែកណាមួយនៃប្រទេសជប៉ុន បន្ទាប់ពីវាក៏បានព្រួសផេះ និងភក់ចេញមកផងដែរ ។

ទន្ទឹមនោះ ប្រសិនបើរលកយក្សស៊ូណាមិមកដល់ប្រទេសជប៉ុនមែននោះ វាអាចវាយប្រហារតំបន់ឆ្នេរនៃកោះនានាក្នុងខេត្តអូគីណាវ៉ា បន្ទាប់ពីឥណ្ឌូណេស៊ីបានបង្កើនការប្រកាសអាសន្នដល់កម្រិតទី ៤ ដែលជាកម្រិតខ្ពស់បំផុតរបស់ខ្លួន ។

ស្របពេលជាមួយគ្នានេះ កិច្ចខិតខំប្រឹងប្រែងជម្លៀសនៅជុំវិញភ្នំភ្លើងនៅក្នុងខេត្ត East Java កំពុងតែដំណើរការយ៉ាងល្អ បន្ទាប់ពីការផ្ទុះភ្នំភ្លើងមួយបានលេបត្របាក់ផ្ទះសម្បែង និងរថយន្តរាប់ពាន់គ្រឿង ខណៈមនុស្សជិត ១០,០០០ នាក់កំពុងស្វែងរកទីជម្រក ក្រោយពេលដែលអាជ្ញាធរបានព្រមានដល់អ្នកស្រុកឲ្យនៅឆ្ងាយពីភ្នំភ្លើងចម្ងាយ ១៣ គីឡូម៉ែត្រ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ឆ្លងចរន្តអគ្គិសនីផ្ទុះឆេះដើមណូអែលក្នុងផ្សារទំនើបនៅ ថៃ ផ្អើលមនុស្សរត់​ព្រោងព្រាត