អាមេរិក និងអឺរ៉ុប ប្រកាសបាត់ដានលុយ ២០០ ពាន់លានដុល្លារពីការបង្កក​ទ្រព្យសម្បត្តិ រុស្ស៊ី

អាមេរិក​ និងសម្ព័ន្ធមិត្ត​អឺរ៉ុប កំពុងតែស្វែងរក​មើលទីតាំងលុយជាង​ ២០០ ពាន់លានដុល្លារទៀតក្នុងចំណោមលុយ ៣០០ ពាន់លានដុល្លារនៃទ្រព្យសម្បត្តិ​របស់រុស្ស៊ី ដែលត្រូវបានបង្កក​កាលពីដើមឆ្នាំ ។

លោក Charles Lichfield អ្នកជំនាញហិរញ្ញវត្ថុជាន់ខ្ពស់នៅក្រុមប្រឹក្សាអាត្លង់ទិកបង្ហាញថា អាមេរិក និងសម្ព័ន្ធមិត្តមិនទាន់ដឹងច្បាស់ទេពីទ្រព្យសម្បត្តិដែលពួកគេបានបង្កក គឺនៅទីណានោះ ។

នៅខែមិថុនា រតនាគារអាមេរិកបានប្រកាសជោគជ័យជាមួយសម្ព័ន្ធមិត្តរបស់ខ្លួនដោយបានបង្កកទ្រព្យសម្បត្តិរដ្ឋរុស្ស៊ីប្រមាណ ៣០០ ពាន់លានដុល្លារ បូករួមទាំងទ្រព្យសម្បត្តិចំនួន ៣០ ពាន់លានដុល្លាររបស់បុគ្គលដែលមានទណ្ឌកម្ម រួមទាំងមហាសេដ្ឋីរុស្ស៊ីផងដែរ ។

ថ្លែងទៅកាន់ប្រព័ន្ធផ្សព្វផ្សាយអេស្តូនី អ្នកជំនាញហិរញ្ញវត្ថុ និងប្រព័ន្ធ​ធានាគារកណ្តាលរបស់រុស្ស៊ី​រូបនេះ​និយាយថា ការពិត ប្រទេសលោកខាងលិច​ គឺរឹបអូសទ្រព្យសម្បត្តិរបស់រុស្ស៊ីបានតែជិត ១០០ ពាន់លានដុល្លារប៉ុណ្ណោះ មិនមែន​ ៣០០ ពាន់លានដុល្លារ​ដូចជាការចុះផ្សាយឡើយ ។

ចំពោះទ្រព្យសម្បតិ្តដែលត្រូវបង្កកនេះ​ លោក Lichfield ពន្យល់បន្ថែមថា ធនាគារបរទេសដែលមានកាតព្វកិច្ច គឺមិនអនុញ្ញតឲ្យផ្ទេរប្រាក់ដែលត្រូវបង្កកទៅឲ្យរុស្ស៊ីវិញនោះឡើយ ។ ទោះបីជាយ៉ាងណាក៏ដោយ ធនាគារអាស៊ី និងអាហ្រ្វិកមួយចំនួនប្រហែលជាមិនមានចំណាប់អារម្មណ៍ចំពោះការឆ្លើយតបទៅនឹងសំណើសុំព័ត៌មានពីអាជ្ញាធរលោកខាងលិចទាក់ទងនឹងប្រតិបត្តិការដែលពាក់ព័ន្ធនឹងប្រទេសរុស្ស៊ីនោះទេ ។

ពាក់ព័ន្ធនឹងបញ្ហានេះដែរ ប្រធានគណៈកម្មការអឺរ៉ុបលោកស្រី Ursula von der Leyen ក៏បានស្នើបង្កើតរចនាសម្ព័ន្ធពិសេសមួយ ដើម្បីគ្រប់គ្រងទ្រព្យសម្បត្តិរុស្ស៊ី និងវិនិយោគផ្សេងៗផងដែរ ។

ដោយឡែក​ នៅអាមេរិក សមាជិកសភាក៏បានស្នើច្បាប់អនុញ្ញាតការពារជាតិឆ្នាំ ២០២៣ ដើម្បីអនុញ្ញាតឲ្យផ្ទេរទ្រព្យសម្បត្តិរុស្ស៊ីដែលត្រូវបានបង្កកទៅឲ្យអ៊ុយក្រែនផងដែរ ប៉ុន្តែសេចក្តីស្នើសុំនេះ គឺនៅមានភាពមិនច្បាស់លាស់នៅឡើយ ។

ជាមួយការផ្ទេរទ្រព្យរុស្ស៊ីទៅឲ្យអ៊ុយក្រែននេះ មន្ត្រីសហភាពអឺរ៉ុបបានបញ្ជាក់ប្រាប់ប្រព័ន្ធផ្សព្វផ្សាយថា ទីក្រុងព្រុចសែល មិនអាចអូសទ្រព្យសម្បត្តិរបស់រុស្ស៊ី ដើម្បីប្រើប្រាស់ក្នុងប្រទេសអ៊ុយក្រែននោះទេ ពីព្រោះប្លុកនេះប្រកាន់ខ្ជាប់នូវគោលការណ៍អភ័យឯកសិទ្ធិរបស់រដ្ឋ ៕

ប្រែសម្រួលដោយ ៖ រតនៈ

ប្រភព ៖ Sputnik

ចុចអាន ៖ អាមេរិក អាចនឹងអស់លុយឲ្យ អ៊ុយក្រែន ទប់ រុស្ស៊ី