រុស្ស៊ី ផ្លាស់ប្តូរមេបញ្ជាការដឹកនាំសង្គ្រាមនៅ អ៊ុយក្រែន (មានវីដេអូ)

ក្រសួងការពារជាតិរុស្ស៊ី បាននិយាយក្នុងសេចក្តីថ្លែងការណ៍មួយនៅថ្ងៃព្រហស្បតិ៍ទី១២ខែមករានេះថា ប្រមុខអគ្គសេនាធិការរុស្ស៊ី លោកឧត្តមសេនីយ៍ Valery Gerasimov ត្រូវបានតែងតាំងឲ្យដឹកនាំក្រុមកងកម្លាំងចម្រុះរបស់ទីក្រុងមូស្គូនៅក្នុងប្រទេសអ៊ុយក្រែន ជំនួសតំណែងឧត្តមសេនីយ៍​ Sergey Surovikin ដែលត្រូវ​បាន​តែងតាំង​ជា​អនុប្រធានវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងនិយាយថា តម្រូវការ គឺត្រូវបង្កើនកម្រិតបញ្ជាការប្រតិបត្តិការ ដើម្បីផ្សារភ្ជាប់ទៅនឹងការកើនឡើងនៃបេសកកម្មប្រយុទ្ធ និងតម្រូវការសម្រាប់កិច្ចសម្របសម្រួលកាន់តែជិតស្និទ្ធរវាងសេវាកម្មផ្សេងៗ និងសាខានៃកងកម្លាំងប្រដាប់អាវុធ។

ការផ្លាស់ប្តូរតំណែងនេះ ក៏នឹងធ្វើឲ្យប្រសើរឡើងនូវការគាំទ្រផ្នែកភស្តុភារ និងប្រសិទ្ធភាពបញ្ជាសម្រាប់កងកម្លាំងរុស្ស៊ីនៅអ៊ុយក្រែនផងដែរ។

រឿងនេះកើតឡើងប្រហែលបីខែ បន្ទាប់ពីក្រសួងការពារជាតិបានតែងតាំងមេបញ្ជាការកងទ័ពអាកាសរុស្ស៊ីលោក Surovikin ឲ្យដឹកនាំកិច្ចខិតខំប្រឹងប្រែងនេះ។

លោក Gerasimov ត្រូវ​បាន​គេ​ស្គាល់​ថា​ជា​មេ​បញ្ជាការ​យោធា​កំពូល​ម្នាក់​របស់​រុស្ស៊ី និង​ជា​អ្នក​យុទ្ធសាស្ត្រ​ដ៏​ល្បី​ឈ្មោះ ​ដែល​ទទួល​បាន​ការ​គោរព​ពី​មេ​បញ្ជាការ​កំពូល​របស់ទី​ក្រុង កៀវ គឺលោក Valery Zaluzhny។ កាលពីខែកញ្ញា លោក Zaluzhny បានប្រាប់កាសែត Time ថា គាត់បានរៀនសូត្រពីលោក Gerasimov។

គួរបញ្ជាក់ថា ឧត្តមសេនីយ៍ពីរនាក់ផ្សេងទៀត ក៏ត្រូវបានតែងតាំងជាអនុប្រធានរបស់លោក Gerasimov នៅក្នុងយុទ្ធនាការយោធាដែលកំពុងបន្តនៅអ៊ុយក្រែនផងដែរ។

ម្នាក់ក្នុងចំណោមនោះគឺជាមេបញ្ជាការកងទ័ពជើងគោករុស្ស៊ី ឧត្តមសេនីយ៍ Oleg Salyukov ចំណែកម្នាក់ទៀតគឺ​វរសេនីយ៍ឯក Aleksey Kim៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ នាវាចម្បាំងរុស្សី បំពាក់មីស៊ីលល្បឿនលឿនជាងសំឡេង ធ្វើសមយុទ្ធសង្រ្គាម ពេលឆ្ពោះដំណើរទៅ អង់គ្លេស