លោក ពូទីន សរសើរថា ប្រតិបត្តិការយោធាពិសេសនៅអ៊ុយក្រែន ដំណើរការល្អតាមផែនការ (មានវីដេអូ)

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានវាយតម្លៃវិជ្ជមាន អំពីវឌ្ឍនភាពនៃប្រតិបត្តិការយោធាពិសេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសជាមួយប៉ុស្តិ៍ទូរទស្សន៍ Rossiya-1 សម្រាប់កម្មវិធី “មូស្គូ ក្រឹមឡាំង ពូទីន”, ប្រមុខរដ្ឋរូបនេះបានបង្ហាញក្តីសង្ឃឹមថា យុទ្ធជនរុស្ស៊ី នឹងបំពេញចិត្តដល់អ្នកគ្រប់គ្នា ជាមួយនឹងលទ្ធផលការងាររបស់ពួកគេ។

ឆ្លើយតបទៅសំណួររបស់អ្នកកាសែត Pavel Zarubin, លោក ពូទីន និយាយថា “ប្រតិបត្តិការមានភាពវិជ្ជមាន។ អ្វីគ្រប់យ៉ាងកំពុងដំណើរការ ស្របទៅតាមផែនការរបស់ក្រសួងការពារជាតិ និងអគ្គសេនាធិការ ហើយខ្ញុំសង្ឃឹមថា យុទ្ធជនរបស់យើង នឹងបំពេញចិត្តយើងម្តងទៀតជាមួយនឹងលទ្ធផលនៃការងារប្រយុទ្ធរបស់ពួកគេ”។

អ្នកនាំពាក្យក្រសួងការពារជាតិរុស្ស៊ី ឧត្តមសេនីយ៍ឯក Igor Konashenkov កាលពីថ្ងៃសុក្រទី១៣ខែមករា បាននិយាយថា កងទ័ពរុស្ស៊ីរំដោះបានទីក្រុង Soledar នៅល្ងាចថ្ងៃទី១២ខែមករា។

លោកនិយាយថា ការគ្រប់គ្រងបានទាំងស្រុងលើទីក្រុង Soledar ធ្វើឲ្យខ្លួនអាចកាត់ផ្តាច់ផ្លូវផ្គត់ផ្គង់របស់កងកម្លាំងអ៊ុយក្រែននៅទីក្រុង Artyomovsk ដែលពីមុនត្រូវបានកងកម្លាំងអ៊ុយក្រែនឡោមព័ទ្ធ។

ដោយឡែក កាលពីចុងសប្តាហ៍ មន្ត្រីក្នុងតំបន់ និងប្រព័ន្ធផ្សព្វផ្សាយបានរាយការណ៍ថា ហេដ្ឋារចនាសម្ព័ន្ធសំខាន់ៗជាច្រើននៅទូទាំងប្រទេសអ៊ុយក្រែន បានរងការវាយប្រហារ ខណៈរដ្ឋមន្ត្រីក្រសួងថាមពលអ៊ុយក្រែន លោក German Galuschenko និយាយថា ការវាយប្រហារនេះបានបណ្តាលឲ្យមានការដាច់ចរន្តអគ្គិសនី នៅក្នុងតំបន់ភាគច្រើននៃប្រទេស។

លោក Galuschenko បានសរសេរនៅលើ Facebook ថា មានការវាយប្រហារនៅតំបន់ Kharkiv, Lviv, Ivano-Frankivsk, Zaporozhye, Vinnytsia និង Kyiv។ លោកព្រមានថា “រយៈពេលពីរបីថ្ងៃទៀត នឹងពិបាកបំផុត”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS

ចុចអាន៖ រុស្ស៊ី បើកការវាយសន្ធាប់ថ្មីទៀត លើហេដ្ឋារចនាសម្ព័ន្ធសំខាន់ៗរបស់ អ៊ុយក្រែន