ព័ត៌មានអន្ដរជាតិ

លោក បៃដិន បញ្ជាឲ្យបង្ហូតទង់ជាតិពាក់កណ្ដាល ដើម្បីគោរពដល់អ្នកស្លាប់ក្នុងការបាញ់ប្រហារថ្ងៃចូលឆ្នាំ ចិន

បានផុស

១ ខែ មុន

នៅ

ថ្ងៃចន្ទ ២៣ មករា ២០២៣

ដោយ

ប្រធានាធិបតីសហរដ្ឋអាមេរិក លោក ចូ បៃដិន បញ្ជាឲ្យបង្ហូតទង់ជាតិពាក់កណ្តាល ដើម្បីគោរពដល់វិញ្ញាណក្ខន្ធជនរងគ្រោះនៃការបាញ់ប្រហារដ៏ធំនៅក្នុងទីក្រុង Monterey Park រដ្ឋកាលីហ្វ័រញ៉ា នៅថ្ងៃទី១ នៃពិធីបុណ្យចូលឆ្នាំថ្មីប្រពៃណីចិន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន និយាយថា ទង់ជាតិក៏នឹងត្រូវបង្ហូតនៅគ្រប់មូលដ្ឋានយោធា និងនាវាកងទ័ពជើងទឹក ក៏ដូចជានៅស្ថានទូតអាមេរិក និងកន្លែងផ្សេងទៀតនៅបរទេសផងដែរ រហូតដល់ថ្ងៃព្រហស្បតិ៍ ទី២៦ ខែមករា ។

កាលពីល្ងាចថ្ងៃសៅរ៍ទី២១ ខែមករា ខ្មាន់កាំភ្លើងម្នាក់បានបើកការបាញ់ប្រហារនៅឯស្ទូឌីយ៉ូរាំក្នុងស្រុកមួយក្នុងទីក្រុង Monterey Park ស្ថិតនៅភាគខាងកើតនៃទីក្រុង Los Angeles ដោយបានសម្លាប់មនុស្ស ១០ នាក់ និង ១០ នាក់ផ្សេងទៀតរងរបួស ។

ក្នុងហេតុការណ៍នោះ ប៉ូលិសបានកំណត់អត្តសញ្ញាណជនសង្ស័យជាខ្មាន់កាំភ្លើងថា ឈ្មោះ Huu Can Tran អាយុ ៧២ ឆ្នាំ ហើយក្រោយមកជនសង្ស័យបានបាញ់សម្លាប់ខ្លួនឯងក្នុងរថយន្តពណ៌ស ដែលប៉ូលិសឡោមព័ទ្ធ ខណៈមន្ត្រីកំពុងដោះស្រាយជាមួយជនសង្ស័យនៅក្នុងសង្កាត់ Torrance ។

គួរបញ្ជាក់ថា Monterey Park គឺជាទីក្រុងមួយដែលមានមនុស្សប្រហែល ៦ ម៉ឺននាក់ស្ថិតនៅជាយភាគខាងកើតទីក្រុង Los Angeles ហើយអ្នកក្រុងភាគច្រើនគឺជាជនអន្តោប្រវេសន៍អាស៊ី ឬអ្នកជាប់សែស្រឡាយអាស៊ី ភាគច្រើនជាជនជាតិចិន ៕