កាលពីថ្ងៃព្រហស្បតិ៍ទី២៦ខែមករា សហរដ្ឋអាមេរិក បានប្រកាសបញ្ជូនរថក្រោះប្រយុទ្ធដ៏មានឥទ្ធិពលចំនួន៣១គ្រឿងទៅកាន់ប្រទេសអ៊ុយក្រែន ខណៈអាល្លឺម៉ង់​ ក៏បញ្ជូនយានប្រយុទ្ធ ទៅប្រឆាំងការវាយលុករបស់រុស្ស៊ីផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តប្រគល់រថក្រោះ M1 Abrams ត្រូវបានប្រកាស ត្រឹមតែប៉ុន្មានម៉ោងប៉ុណ្ណោះ បន្ទាប់ពីអាល្លឺម៉ង់និយាយថា ខ្លួននឹងបញ្ជូនរថក្រោះ Leopard 2 ចំនួន១៤គ្រឿងទៅកាន់សមរភូមិ។

រថក្រោះយោធាផលិតនៅសហរដ្ឋអាមេរិក គឺជារថក្រោះប្រយុទ្ធដ៏ទំនើបបំផុតមួយនៅក្នុងពិភពលោក ហើយត្រូវការការហ្វឹកហ្វឺនជាក់លាក់ដើម្បីប្រតិបត្តិការ។ កញ្ចប់ថវិកា៤០០លានដុល្លាររបស់អាមេរិកនេះ ក៏រួមបញ្ចូលទាំងរថយន្តសង្គ្រោះចំនួនប្រាំបីគ្រឿងផងដែរ ដែលអាចអូសរថក្រោះ ប្រសិនបើពួកគេត្រូវរងការវាយប្រហារ។

ទោះបីជាយ៉ាងណាក៏ដោយ វាត្រូវចំណាយពេលច្រើនខែ មុនពេលរថក្រោះដឹកទៅដល់សមរភូមិ ព្រោះរថក្រោះទាំងនោះ នឹងត្រូវបានទិញពីអ្នកម៉ៅការឯកជន មិនមែនបញ្ជូនពីឃ្លាំងស្តុកដែលមានស្រាប់នោះទេ។

ចុះតើអ្នកដឹងទេថា រថក្រោះប្រភេទនេះ មួយគ្រឿងតម្លៃប៉ុន្មាន?

យោងតាមប្រព័ន្ធផ្សព្វផ្សាយអាមេរិក, រថក្រោះធុន Abrams មួយគ្រឿងមានតម្លៃចន្លោះពី ៦ ទៅ ៩ លានដុល្លារ។ យ៉ាងណាក្តី ប្រទេសដែលទិញពួកគេ ដូចជាប៉ូឡូញ ក៏ត្រូវចំណាយប្រាក់សម្រាប់ការថែទាំដ៏ស្មុគស្មាញបន្ថែមផងដែរ។ នោះមានន័យថា ទីក្រុងវ៉ាសូវី ត្រូវចំណាយប្រហែល១៩លានដុល្លារ សម្រាប់រថក្រោះមួយគ្រឿង៕

ប្រែសម្រួល៖ Vann Vann

ប្រភព៖ Sputnik

ចុចអាន៖ រុស្ស៊ី ព្រមានថា រថក្រោះអាមេរិក នឹងត្រូវកម្ទេចលើដី អ៊ុយក្រែន