លោក Lavrov ៖ ណាតូ លូកដៃក្នុងសង្គ្រាមកូនកាត់ប្រឆាំង រុស្ស៊ី យូរណាស់​មកហើយ

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅក្នុងសន្និសីទសារព័ត៌មានមួយ បន្ទាប់ពីកិច្ចពិភាក្សាជាមួយរដ្ឋមន្ត្រីការបរទេសអេហ្ស៊ីបលោក Sameh Shoukry កាលពីថ្ងៃអង្គារថា អង្គការណាតូបានលូកដៃចូលរួមក្នុងសង្គ្រាមកូនកាត់ប្រឆាំងនឹងរុស្ស៊ីអស់រយៈពេលជាយូរណាស់មកហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានបញ្ជាក់ថា “លោកខាងលិចចាត់ទុកការបញ្ជូនអាវុធទៅកាន់អ៊ុយក្រែន ជាសកម្មភាពត្រឹមត្រូវ និងស្របច្បាប់របស់ពួកគេ ហើយពួកគេគិតថា ការផ្គត់ផ្គង់សព្វាវុធទៅឲ្យរដ្ឋាភិបាលទីក្រុងកៀវដើម្បីទប់ទល់ជាមួយរុស្ស៊ី គឺជាផ្លូវឆ្ពោះទៅរកសន្តិភាព” ។

ទន្ទឹមនោះ លោក Lavrov ក៏បានកត់សម្គាល់ផងដែរថា ទីក្រុងមូស្គូកំពុងចាត់វិធានការចាំបាច់ ដើម្បីទប់ស្កាត់ការប៉ុនប៉ងប្រែក្លាយអ៊ុយក្រែន ទៅជាការគំរាមកំហែងកាន់តែធ្ងន់ធ្ងរចំពោះសន្តិសុខរបស់រុស្ស៊ី ។

លោក Lavrov បានគូសបញ្ជាក់ថា រុស្ស៊ីកំពុងឃ្លាំមើលដំណើរការនេះ ខណៈកងកម្លាំងប្រដាប់អាវុធរុស្ស៊ីក៏ចាត់វិធានការចាំបាច់ទាំងអស់ ដើម្បីទប់ស្កាត់ផែនការរបស់លោកខាងលិចមិនឲ្យសម្រេចបានផងដែរ ។

ស្របពេលជាមួយគ្នានេះ ការអះអាងរបស់រដ្ឋមន្ត្រីការបរទេសរុស្ស៊ីខាងលើកើតឡើងតែប៉ុន្មានថ្ងៃប៉ុណ្ណោះ បន្ទាប់ពីលោក Vyacheslav Volodin ប្រធានសភាជាន់ទាបរបស់រុស្ស៊ី ឬ State Duma កាលពីថ្ងៃអាទិត្យ ក៏បានចោទប្រកាន់អង្គការណាតូដែរថា កំពុងប្រើប្រាស់អ៊ុយក្រែនជាកន្លែងហ្វឹកហាត់ដើម្បីធ្វើតេស្តអាវុធ និងសាកល្បងវិធីថ្មីនៃសង្រ្គាមរបស់ពួកគេ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ក្រៅពីរថក្រោះ អ៊ុយក្រែន ចង់បាននាវាមុជទឹក និងនាវាចម្បាំងបន្ថែមទៀត