តួកគីដែលកំពុងជួបគ្រោះរញ្ជួយដីដ៏ខ្លាំងក្លាកម្រិត ៧.៨ រ៉ិចទ័រ ពេលនេះទទួលបានជំនួយសង្គ្រោះជាច្រើនពីបណ្ដាប្រទេសផ្សេងៗគ្នា ដោយក្នុងនោះក៏មានអ៊ុយក្រែនផងដែរ ខណៈរុស្ស៊ីវិញបានចូលរួមរំលែកទុក្ខដល់ជនរងគ្រោះក្នុងហេតុការណ៍ដ៏បំផ្លិចបំផ្លាញមួយនេះ ។

ប្រធានាធិបតីអ៊ុយក្រែនលោក Volodymyr Zelensky បានថ្លែងសារតាមរយៈវីដេអូមួយថា “អ៊ុយក្រែនបានផ្ដល់ជំនួយសម្រាប់ប្រតិបត្តិការរុករក និងជួយសង្គ្រោះដល់រដ្ឋាភិបាលរបស់លោក Recep Tayyip Erdogan បើទោះបីជាប្រទេសរបស់ខ្លួនកំពុងហែកហួរដោយសង្គ្រាមក៏ដោយ ។

ចំណែកប្រធានាធិបតីរុស្ស៊ី លោក Vladimir Putin បានចូលរួមរំលែកទុក្ខ និងសម្ដែងការអាណិតអាសូរចំពោះការស្លាប់របស់មនុស្សរាប់ពាន់នាក់ និងបានជូនពរអ្នករបួសក្នុងគ្រោះរញ្ជួយដីដ៏ខ្លាំងក្លានៅភាគខាងត្បូងមួយនេះ ឲ្យឆាប់សះស្បើយផងដែរ ។

ពាក់ព័ន្ធនឹងសោកនាដកម្មនេះដែរ លោកប្រធានាធិបតី Recep Tayyip Erdogan បានប្រកាសកាន់ទុក្ខនៅទូទាំងប្រទេសរយៈពេល ៧ ថ្ងៃផងដែរ ។

គួរបញ្ជាក់ថា គ្រោះរញ្ជួយដីដ៏សាហាវដែលបានវាយប្រហារដល់ខេត្តចំនួន ១០ នៅភាគខាងត្បូងប្រទេសតួកគីកាលពីថ្ងៃចន្ទ បានសម្លាប់មនុស្សយ៉ាងហោចណាស់ ៥,៨៩៤ នាក់ និងជាង ១៤,៤៨៣ នាក់ផ្សេងទៀតបានរងរបួស ៕

ដោយ ៖ ជីវ័ន្ត

ចុចអាន ៖ មនុស្សស្លាប់ក្នុងគ្រោះរញ្ជួយដីនៅ តួកគី កើនដល់ជិត ៨ពាន់នាក់