អ៊ុយក្រែន ថា អត្រាស្លាប់របស់ទាហានរុស្ស៊ី ឡើងដល់កម្រិតខ្ពស់បំផុត ចាប់តាំងពីសប្តាហ៍ដំបូងនៃការលុកលុយ (មានវីដេអូ)

ទិន្នន័យ​បង្ហាញ​ថា ក្នុងខែនេះ ទាហាន​រុ​ស្ស៊ី​នៅ​អ៊ុយ​ក្រែ​ន ​កំពុង​ស្លាប់​ក្នុង​ចំនួន​ច្រើន​ជាង​ពេល​ណា​ៗទាំងអស់ ​ចាប់តាំងពីសប្តាហ៍ដំបូងនៃ​ការ​លុកលុយ​។

ទិន្នន័យរបស់អ៊ុយក្រែនបង្ហាញថា ជាមធ្យមទាហានរុស្ស៊ី ៨២៤នាក់ បានស្លាប់ជារៀងរាល់ថ្ងៃក្នុងខែកុម្ភៈ។

តួលេខនេះ ក៏ត្រូវបានគូសបញ្ជាក់ដោយក្រសួងការពារជាតិចក្រភពអង់គ្លេសផងដែរ ហើយទំនងជាមានភាពត្រឹមត្រូវ ទោះបីជាពួកគេមិនអាចផ្ទៀងផ្ទាត់ជាផ្លូវការក៏ដោយ។

ការបញ្ចេញទិន្នន័យនេះ កើតឡើងចំពេលមានពាក្យចចាមអារ៉ាមថា រុស្ស៊ីនឹងបើកការវាយលុកនានិទាឃរដូវ នៅភាគខាងកើតប្រទេសអ៊ុយក្រែន។

កាលពីសប្តាហ៍មុន រដ្ឋមន្ត្រីការពារជាតិអ៊ុយក្រែនលោក Oleksiy Reznikov និយាយថា ការវាយលុកថ្មី ត្រូវបានគេរំពឹងថានឹងធ្វើឡើងនៅថ្ងៃទី២៤ខែកុម្ភៈ ដែលជាខួបលើកទី១នៃសង្គ្រាមលុកលុយ។

ក្នុងសប្តាហ៍ដំបូងនៃការវាយលុក ទាហានរុស្ស៊ីជាមធ្យម១១៤០នាក់ ត្រូវបានសម្លាប់ជារៀងរាល់ថ្ងៃ ប៉ុន្តែក្នុងរយៈពេលមួយឆ្នាំចុងក្រោយនេះ អត្រាបានធ្លាក់ចុះ។

យោងតាមការអះអាងពីភាគីអ៊ុយក្រែន, នៅក្នុងខែមិថុនា ទាហានរុស្ស៊ីស្លាប់ជាមធ្យមគឺ១៧២នាក់ មុនពេលកើនឡើងសាជាថ្មីដល់ ៥៥៩នាក់នៅក្នុងខែវិច្ឆិកា។

យ៉ាងណាមិញ ក្រសួងការពារជាតិអ៊ុយក្រែន បានសង្កត់ធ្ងន់ថា កងកម្លាំងរបស់ខ្លួន ក៏កំពុងមានអត្រាស្លាប់ខ្ពស់ផងដែរ។

ទោះបីជាយ៉ាងណាក៏ដោយ ការអះអាងខាងលើនេះ គ្រាន់តែជាការបញ្ជាក់ពីភាគីអ៊ុយក្រែន តែម្ខាងប៉ុណ្ណោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ សមាជិកណាតូ ថា អ៊ុយក្រែន នឹងត្រូវរុស្ស៊ីកម្ចាត់ បើគ្មានជំនួយសព្វាវុធជាបន្ទាន់ពី លោកខាងលិច