អតីតប្រធានធនាគារចិន Merchants Bank ត្រូវចោទប្រកាន់ពីបទ ស៊ីសំណូក

លោក Tian Huiyu អតីតប្រធានធនាគារចិន Merchants Bank ត្រូវបានចោទប្រកាន់ពីបទស៊ីសំណូក និងរំលោភអំណាច។ នេះបើតាមការបញ្ជាក់ពីរដ្ឋអាជ្ញាកំពូលរបស់ប្រទេសចិន នៅថ្ងៃអង្គារទី២៨ខែកុម្ភៈ។

រដ្ឋអាជ្ញាកំពូលបាននិយាយនៅក្នុងសេចក្តីថ្លែងការណ៍មួយថា លោក Tian ដែលក៏ជាអតីតលេខាបក្សរបស់ធនាគារខាងលើផងដែរនោះ បានរំលោភលើមុខតំណែងរបស់គាត់នៅក្នុងធនាគារ និងតួនាទីមុនៗ ដើម្បីផ្តល់ផលប្រយោជន៍ដល់អ្នកដទៃជាថ្នូរនឹងសូកប៉ាន់ដ៏ច្រើនលើសលប់។

សេចក្តីថ្លែងការណ៍បន្តថា លោក Tian ក៏ត្រូវបានចោទប្រកាន់ផងដែរពីបទចូលរួមក្នុងសកម្មភាពជួញដូរមូលបត្រដោយខុសច្បាប់  និងធ្វើឲ្យព័ត៌មានផ្ទៃក្នុង ត្រូវលេចធ្លាយ។

លោក Tian អាយុ៥៨ឆ្នាំ ត្រូវបានចាប់ខ្លួនកាលពីខែតុលាឆ្នាំមុន។ បក្ស​កុម្មុយនិស្ត បាន​បណ្តេញគាត់​ចេញ ហើយដក​តំណែង​សាធារណៈ​នៅ​ដើម​ខែ​នោះ។

មុនពេលចូលរួមជាមួយធនាគារចិន Merchants Bank ក្នុងឆ្នាំ២០១៣, លោក Tian បានបម្រើតួនាទីជាអ្នកគ្រប់គ្រងនៅក្នុងធនាគារចិន Construction Bank របស់រដ្ឋ និងធនាគារ Cinda Asset Management៕

ប្រែសម្រួល៖ Vann Vann

ប្រភព៖ CNA

ចុចអាន៖ ធនាគារពិភពលោក ប៉ាន់ប្រមាណទំហំនៃការខូចខាតរបស់តួកគី ក្រោយរញ្ជួយដី