ធ្លាយសារធាតុគីមីនៅរោងចក្រ Coca-Cola ក្នុងរដ្ឋ Florida ជំរុញឲ្យជម្លៀសមនុស្ស

មន្ត្រីក្នុងតំបន់និយាយថា កម្មករនៅរោងចក្រ Coca-Cola ក្នុងរដ្ឋ Florida ត្រូវបានបង្ខំឲ្យជម្លៀសចេញ បន្ទាប់ពីមានការលេចធ្លាយសារធាតុគីមីដ៏ធំមួយ។ ការលេចធ្លាយនេះ ក៏បានជំរុញឲ្យប្រជាពលរដ្ឋក្នុងតំបន់ រត់រកកន្លែងមានសុវត្ថិភាពផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធុងចំណុះ ២ម៉ឺនហ្គាឡុង ត្រូវបានគេរកឃើញថា លេចធ្លាយអាម៉ូញាក់ នៅឯរោងចក្រក្នុងទីក្រុង Auburndale នៅថ្ងៃព្រហស្បតិ៍ទី១៦ខែមីនា (ពេលវេលានៅអាមេរិក) ខណៈបុគ្គលិកទាំងអស់ ត្រូវបានជម្លៀសចេញពីរោងចក្រ។ នេះបើតាមការបញ្ជាក់ពីអ្នកនាំពាក្យទីក្រុង ប្រាប់ទៅសារព័ត៌មាន FOX។

ទោះបីជាយ៉ាងណាក៏ដោយ ក្រុមពន្លត់អគ្គិភ័យ បានគ្រប់គ្រងការលេចធ្លាយដោយជោគជ័យ ​ខណៈប្រតិបត្តិការ​សម្អាត ​បាន​បញ្ចប់​នៅ​ប្រហែល​ម៉ោង៣និង៣០នាទី​រសៀល។

មិនមានរបាយការណ៍ណាមួយអំពីការរងរបួសធ្ងន់ធ្ងរដល់បុគ្គលិក ឬអ្នករស់នៅក្នុងតំបន់ទេ ថ្វីបើក្រោយមក ក្រុមហ៊ុន Coca-Cola បានចេញសេចក្តីថ្លែងការណ៍មួយដោយកត់សម្គាល់ថា “បុគ្គលិកផ្នែកអគ្គិសនីមួយចំនួនដែលធ្វើការនៅក្បែរនោះ រលាកភ្នែក និងបំពង់ក ក៏ដោយ”។

ប្រធានផ្នែកពន្លត់អគ្គិភ័យលោក David Cash ក៏និយាយផងដែរថា ប្រជាពលរដ្ឋមួយចំនួន បានទូរស័ព្ទត្អូញត្អែរអំពីក្លិនគីមី និង ការរមាស់ ដែលអាចបណ្តាលមកពីការធ្លាយនេះ។

លោក Cash និយាយថា ការលេចធ្លាយនេះគឺបណ្តាលមកពីបញ្ហាជាមួយបំពង់នៅលើកុងតឺន័រ២ម៉ឺនហ្គាឡុង។ ស្របពេលជាមួយគ្នានោះ ក្រុមហ៊ុន Coca-Cola ក៏បានសុំទោសដល់និយោជិត និងអ្នកក្នុងតំបន់ សម្រាប់បញ្ហាទាំងឡាយផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ Pepsi និង Coca-Cola ឈប់លក់ទឹកក្រូចឲ្យ រុស្ស៊ី ផឹក