បាញ់ប្រហារក្នុងពិធីខួបកំណើតនៅរដ្ឋ អាឡាបាម៉ា, ស្លាប់និងរបួសមនុស្សជាង ៣០នាក់ 

មនុស្សចំនួន៤នាក់បានស្លាប់ និង២៨ទៀតរងរបួស ពេលការបាញ់ប្រហារមួយបានផ្ទុះឡើង នៅឯពិធីខួបកំណើតដែលមានមនុស្សច្រើនកុះករ នៅក្នុងទីក្រុងតូចមួយនៃរដ្ឋ អាឡាបាម៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាញ់ប្រហារនៅទីក្រុង Dadeville ក្នុងរដ្ឋ អាឡាបាម៉ា បានកើតឡើងនៅម៉ោង ១០:៣៤យប់ថ្ងៃសៅរ៍ (ពេលវេលានៅអាមេរិក)។

ស្របពេលជាមួយគ្នានោះ ភ្នាក់ងារពិសេសមកពីកងកម្លាំងរដ្ឋអាឡាបាម៉ា (ALEA) បានបើកការស៊ើបអង្កេតអំពីការបាញ់ប្រហារនេះ តាមសំណើរបស់ប្រធានប៉ូលិសក្រុង Dadeville។

ទោះបីជាយ៉ាងណាក៏ដោយ ALEA មិន​បាន​បញ្ចេញ​ព័ត៌មាន​លម្អិត​បន្ថែមលើសនេះ​ទេ​។

អាជ្ញាធរ ក៏​មិន​បានបញ្ជាក់ឈ្មោះ​ជន​សង្ស័យ ឬ​ការ​ចាប់​ខ្លួនអ្វីដែរ ​គិត​ត្រឹម​ល្ងាច​ថ្ងៃ​អាទិត្យហើយប៉ូលិសនិយាយថា មិនមានហានិភ័យសុវត្ថិភាពសាធារណៈឡើយនៅពេលនេះ។

យ៉ាងណាមិញ ក្រោយមក លោកប្រធានាធិបតី ចូ បៃដិន បានចេញសេចក្តីថ្លែងការណ៍មួយ ដោយអំពាវនាវឲ្យសភា អនុម័តច្បាប់គ្រប់គ្រងកាំភ្លើងរួម ដើម្បីឆ្លើយតបទៅនឹងការបាញ់ប្រហារកាលពីចុងសប្តាហ៍។

លោក បៃដិន និយាយថា អំពើហិង្សាដោយកាំភ្លើងនៅអាមេរិកគឺ កំពុងកើនឡើងនិងក្នុងកម្រិតមិនអាចទទួលយកបាន។ លើសពីនេះ លោកកត់សម្គាល់ថា ប្រជាជនអាមេរិកយល់ព្រម និងចង់ឲ្យសមាជិកសភា ធ្វើសកម្មភាពលើកំណែទម្រង់សុវត្ថិភាពកាំភ្លើងតាមសុភវិនិច្ឆ័យ៕

ប្រែសម្រួល៖ Vann Vann

ប្រភព៖ ABC

ចុចអាន៖ បាញ់ប្រហារ ៣លើក ស្លាប់និងរបួសមនុស្សជាង ៣០នាក់ នៅ សហរដ្ឋអាមេរិក