អ្នកវិភាគ ថៃ ទស្សន៍ទាយពីបក្សនយោបាយដែលឈ្នះការបោះឆ្នោតខាងមុខ

បើយោងតាម​ការ​វិភាគ​របស់​ក្រុមនិពន្ធនាយកនៃក្រុមហ៊ុនប្រព័ន្ធផ្សព្វផ្សាយ Nation Group បានឲ្យដឹងថា គណបក្ស​ភឿថៃ​ទំនង​ជា​នឹងទទួលបាន​ជ័យជម្នះ​ក្នុង​ការ​បោះ​ឆ្នោត​សកល​នៅ​ថ្ងៃ​ទី ១៤ ខែ​ឧសភា ជាមួយនឹង​អាសនៈ​សមាជិក​សភា​ជិត ២០០ ក្នុង​ចំណោម ៤០០ អាសនៈ ​ ។

ក្រុមអ្នកវិភាគបាននិយាយថា បក្សភឿថៃរបស់កូនស្រីលោក ថាក់ស៊ីន ស៊ីណាវ៉ាត់ត្រា មានឱកាសល្អក្នុងការឈ្នះអាសនៈសមាជិកសភាចំនួន ១៩៤ ហើយនឹងអាចទទួលបានសំឡេងចំនួន ៨៤ បន្ថែមទៀតសម្រាប់ការគាំទ្រលើគណបក្សរបស់ខ្លួន ។

ការវិភាគដែលផ្អែកលើការរកឃើញនៃការស្ទង់មតិទូទាំងប្រទេសនាពេលថ្មីៗនេះរបស់អ្នកដែលមានសិទ្ធិបោះឆ្នោតបានឲ្យដឹងទៀតថា សមាជិកនៃក្រុមចម្រុះដែលកំពុងកាន់អំណាច គឺគណបក្ស Bhumjaithai ត្រូវបានគេរំពឹងថា នឹងជាប់ចំណាត់ថ្នាក់លេខ ២ ក្នុងការប្រកួតប្រជែងសម្រាប់អាសនៈសមាជិកសភាចំនួន ៤០០ អាសនៈ ដោយអាចទទួលបានអាសនៈសមាជិកសភាចំនួន ៥៨ បូករួមនឹង ៤៤ អាសនៈសម្រាប់ការគាំទ្រគណបក្ស ។

ចំណែកគណបក្សប្រជាធិបតេយ្យ ដែលជាក្រុមនយោបាយចាស់ជាងគេរបស់ប្រទេសថៃ ទំនងជានឹងបញ្ចប់ក្នុងចំណាត់ថ្នាក់លេខ ៣ ជាមួយនឹងឱកាសឈ្នះអាសនៈសមាជិកសភាចំនួន ៥១ ។

គួរបញ្ជាក់ថា នៅក្នុងការបោះឆ្នោតនាថ្ងៃទី ១៤ ឧសភា ខាងមុខនេះ អ្នកបោះឆ្នោតថៃនឹងត្រូវគូសលើសន្លឹកឆ្នោតចំនួន ២ គឺសន្លឹកឆ្នោតមួយសម្រាប់បេក្ខជននៅក្នុងមណ្ឌល និងសន្លឹកឆ្នោតមួយទៀត សម្រាប់គណបក្សនយោបាយដែលពួកគេពេញចិត្ត ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ រុស្ស៊ី ប្រាប់គោលដៅសំខាន់ទើបឈានដល់ផ្ទុះសង្គ្រាមជាមួយ អ៊ុយក្រែន