លោក ប្រាយុទ្ធ ផ្តាំផ្ញើអត្តពលិក ថៃ កុំបង្កបញ្ហានៅស៊ីហ្គេម និងមិនគួររិះគន់ម្ចាស់ផ្ទះ កម្ពុជា ឡើយ

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានប្រាប់ក្រុមអត្តពលិកថៃ ដែលចូលរួមព្រឹត្តិការណ៍ស៊ីហ្គេមឆ្នាំ២០២៣ នៅប្រទេសកម្ពុជា កុំឲ្យគិតពីរឿងនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃពុធទី២៦ខែមេសា លោក ប្រាយុទ្ធ បានស្វាគមន៍អត្តពលិក និងមន្ត្រីថៃនៅវិមានរដ្ឋាភិបាល មុនពេលពួកគេចូលរួមប្រកួតកីឡាស៊ីហ្គេម ដែលនឹងប្រព្រឹត្តិទៅចាប់ពីថ្ងៃទី ៥ ដល់ថ្ងៃទី ១៧ ខែឧសភា។

លោក ប្រាយុទ្ធ បាន​ប្រាប់​អ្នក​កាសែត​ថា “​កុំ​យក​កីឡា​លាយឡំជាមួយ​នឹង​នយោបាយ​។ យើងកំពុងស្ថិតក្នុងដំណើរការបោះឆ្នោតសកល។ យើងមិនគួររិះគន់ម្ចាស់ផ្ទះកម្ពុជាទេ វាជារឿងរបស់គេ។ យើងមានរឿងផ្ទាល់ខ្លួន វាជាបញ្ហាផ្សេងគ្នា ហើយកុំយកវាទៅលាយឡំគ្នា។ អ្នក​ណាធ្វើ​បែប​នេះ វា​នឹង​ក្លាយ​ទៅ​ជា​ចលាចល​”។

លោក ប្រាយុទ្ធ បន្ថែមថា “ខ្ញុំបានប្រាប់មន្ត្រី និងអត្តពលិកថៃ ឲ្យទៅកម្ពុជា ដើម្បីបង្កើតទំនាក់ទំនងល្អ ក្តីស្រឡាញ់ និងសាមគ្គីភាព។ យើងត្រូវតែអត់ធ្មត់ មានបញ្ហាជាច្រើនរួចទៅហើយ ហើយយើងមិនគួរបង្កើតបន្ថែមទៀតទេ។ យើងគួរតែរក្សាសន្តិភាព យើងទាំងអស់គ្នាគឺជាអ្នកជិតខាងគ្នា”។

ទន្ទឹមនោះ លោក​ក៏​បាន​រិះគន់​អ្នក​ដែល​វាយ​ប្រហារ​ប្រទេស​កម្ពុជា ​តាម​បណ្តាញ​សង្គមផងដែរ ហើយលោក ប្រាយុទ្ធ បានប្រាប់ក្រុមថៃថា ពួកគេគួរតែមានមោទកភាព ដែលតំណាងឲ្យប្រទេស។

គួរបញ្ជាក់ថា ហ្គេមលើកទី ៣២ នៅកម្ពុជា មានចំនួន ៣៧ ប្រភេទកីឡាដែលផ្តល់មេដាយមាសចំនួន ៦០៨ ខណៈថៃ បានដាក់គោលដៅយកមេដាយមាសឲ្យបាន ១១២មេដាយ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ចោទថា កម្ពុជា មិនផ្តល់ប្រាក់ឧបត្ថម្ភ ឬកន្លែងស្នាក់នៅដល់អាជ្ញាកណ្តាល សម្រាប់ព្រឹត្តិការណ៍ ស៊ីហ្គេម