ព័ត៌មានអន្ដរជាតិ

អ៊ីស្រាអែល សម្លាប់ប្រជាជន ប៉ាឡេស្ទីន ៣០ នាក់ក្នុងអំពើហិង្សាផ្ទុះឡើងជាថ្មី

បានផុស

២ ម៉ោង មុន

នៅ

ថ្ងៃសុក្រ ១២ ឧសភា ២០២៣

ដោយ

ក្រសួងសុខាភិបាលប៉ាឡេស្ទីនបាននិយាយថា អ៊ីស្រាអែលបានសម្លាប់ប្រជាជនប៉ាឡេស្ទីនចំនួន ៣០ នាក់ និងជាង ៩០ នាក់ផ្សេងទៀតរងរបួសក្នុងការវាយប្រហារតាមអាកាសលើតំបន់កាហ្សាស្រ្ទីប ចាប់តាំងពីថ្ងៃអង្គារមក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ ក្នុងចំណោមជនរងគ្រោះទាំង ៣០ នាក់នោះ រួមមានកុមារ ៦ នាក់ ស្ត្រី ៣ នាក់ និងព្រមទាំងមានប្រធាន និងអនុប្រធានកងកម្លាំងបាញ់រ៉ុកកែតឥស្លាមជីហាតប៉ាឡេស្ទីន (PIJ) ផងដែរ ។

ស្របពេលជាមួយគ្នានេះ ការវាយប្រហាររបស់អ៊ីស្រាអែលបានកើតឡើង បន្ទាប់ពីបក្សពួកប៉ាឡេស្ទីននៅតំបន់ហ្គាហ្សាស្រ្ទីប បានបន្តបាញ់គ្រាប់រ៉ុកកែតជាការសងសឹក ពីតំបន់ឆ្នេរដែលឡោមព័ទ្ធចូលទៅក្នុងប្រទេសអ៊ីស្រាអែល ដោយបានសម្លាប់មនុស្សម្នាក់កាលពីថ្ងៃព្រហស្បតិ៍ ។

ពាក់ព័ន្ធនឹងបញ្ហានេះដែរ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយនៅក្នុងសេចក្តីថ្លែងការណ៍ជាវីដេអូមួយ ដែលចេញផ្សាយក្នុងអំឡុងដំណើរទស្សនកិច្ចទៅកាន់មូលដ្ឋានទ័ពអាកាសថា “យើងស្ថិតនៅក្នុងកម្រិតប្រុងជើងការខ្ពស់ ទាំងការវាយលុក និងការការពារ ហើយអ្នកណាដែលមកធ្វើបាបយើង នោះឈាមរបស់គេនឹងត្រូវស្រក់ចុះដល់ដី” ។

គួរបញ្ជាកថា បើទោះបីជាមានកិច្ចខិតខំប្រឹងប្រែងសម្រុះសម្រួលពីសំណាក់ប្រទេសអេហ្ស៊ីបក៏ដោយ ប៉ុន្តែភាគីទាំងពីរហាក់ដូចជាមិនបានត្រៀមខ្លួនរួចរាល់ក្នុងការទប់ស្កាត់ការប៉ះទង្គិចគ្នាដ៏អាក្រក់បំផុត ដែលផ្ទុះមានឡើងចាប់តាំងពីខែសីហាឆ្នាំមុនមកនោះទេ ៕