ព្យុះស៊ីក្លូនដ៏គ្រោះថ្នាក់ កំពុងបោះពួយ ទៅវាយប្រហារ ជំរំជនភៀសខ្លួនធំបំផុតរបស់ ពិភពលោក

មនុស្សប្រហែលកន្លះលាននាក់ កំពុងត្រូវបានជម្លៀសទៅកាន់ទីតាំងសុវត្ថិភាពនៅភាគអាគ្នេយ៍ប្រទេសបង់ក្លាដែស ខណៈព្យុះស៊ីក្លូនដ៏គ្រោះថ្នាក់បំផុត​ កំពុងសំដៅទៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះ Mocha ត្រូវ​បាន​គេ​ព្យាករ​ថា ​នឹងបង្កឲ្យមានបំណាក់ដី ​នៅ​ថ្ងៃ​អាទិត្យ​ទី១៤ខែឧសភា និងនាំមកនូវជាមួយខ្យល់បក់ក្នុងល្បឿន ១៧០គីឡូម៉ែត្រក្នុងមួយម៉ោង។

ស្របពេលជាមួយគ្នានោះ មានការព្រួយបារម្ភថា ព្យុះស៊ីក្លូននេះនឹងវាយប្រហារចំជំរំជនភៀសខ្លួនដ៏ធំបំផុតរបស់ពិភពលោកគឺ Cox’s Bazar។

ភ្លៀង ​កំពុង​ធ្លាក់ជញ្ជ្រំ​លើ​ជំរំនេះរួចទៅហើយ ហើយ​ការ​ប្រកាសអាសន្នពណ៌​ក្រហម ​ត្រូវ​បានចេញ សម្រាប់ទីតាំងដែលផ្ទុកមនុស្សជិតមួយលាននាក់មួយនេះ។

នៅពេលព្យុះបោះពួយទៅកាន់ឆ្នេរសមុទ្របង់ក្លាដែស-មីយ៉ាន់ម៉ា, អាកាសយានដ្ឋាននៅក្បែរនោះត្រូវបានបិទ អ្នកនេសាទត្រូវគេប្រាប់ឲ្យផ្អាកការងាររបស់ពួកគេ ហើយជម្រកចំនួន១៥០០ ត្រូវបង្កើតឡើង ខណៈប្រជាជនមកពីតំបន់ងាយរងគ្រោះបានរើទៅកន្លែងសុវត្ថិភាព។

លោក Vibhushan Kanti Das មន្ត្រីជាន់ខ្ពស់នៅ Cox’s Bazar បានប្រាប់ BBC ថា “យើងត្រៀមខ្លួនរួចជាស្រេចដើម្បីប្រឈមមុខនឹងគ្រោះថ្នាក់ណាមួយ យើងមិនចង់បាត់បង់ជីវិតមនុស្សសូម្បីតែម្នាក់”។

គួរបញ្ជាក់ថា Mocha អាចជាព្យុះដ៏មានឥទ្ធិពលបំផុត មិនធ្លាប់ត្រូវបានគេជួបប្រទះសោះនៅប្រទេសបង់ក្លាដែស ក្នុងរយៈពេលជិតពីរទសវត្សរ៍មកនេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ បង់ក្លាដែស និងមីយ៉ាន់ម៉ា ជម្លៀសមនុស្សរាប់សែននាក់ ដោយសារព្យុះស៊ីក្លូន ដ៏ខ្លាំងក្លា