ព័ត៌មានអន្ដរជាតិ

តុលាការបង់ក្លាដែសកាត់ទោសលោកស្រី Hasina ដាក់គុក២១ឆ្នាំ បន្ថែមពីលើទោសប្រហារជីវិត

បានផុស

៧ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

Chheang

កាលពីថ្ងៃព្រហស្បតិ៍ទី២៧ខែវិច្ឆិកាឆ្នាំ២០២៥ តុលាការបង់ក្លាដែសបានកាត់ទោសអតីតនាយករដ្ឋមន្ត្រី លោកស្រី Sheikh Hasina ដាក់ពន្ធនាគារ២១ឆ្នាំ ពីបទចោទប្រកាន់ពុករលួយ ដែលបន្ថែមលើទោសប្រហារជីវិតដែលលោកស្រីបានទទួលកាលពីសប្តាហ៍មុន ពាក់ព័ន្ធបទឧក្រិដ្ឋកម្មប្រឆាំងមនុស្សជាតិ ជុំវិញការបង្ក្រាបលើក្រុមបាតុករនិស្សិតកាលពីឆ្នាំ២០២៤។

*លោកស្រី Sheikh Hasina (រូបថត៖ Reuters)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម AFP លោកស្រី Hasina ដែលមានវ័យ៧៨ឆ្នាំ ត្រូវបានកាត់ទោសកំបាំងមុខក្នុងសំណុំរឿងចំនួនបី ដែលបានដាក់ដោយគណៈកម្មាធិការប្រឆាំងអំពើពុករលួយ។

អតីតនាយករដ្ឋមន្ត្រីរូបនេះបានភៀសខ្លួនចេញពីប្រទេសបង់ក្លាដែសតាមឧទ្ធម្ភាគចក្រកាលពីខែសីហាឆ្នាំ២០២៤ បន្ទាប់ពីមានការតវ៉ាជាច្រើនសប្តាហ៍ដែលបានផ្តួលរំលំរដ្ឋាភិបាលរបស់លោកស្រី ហើយបច្ចុប្បន្នកំពុងរស់នៅក្នុងប្រទេសឥណ្ឌា ដោយបដិសេធគោរពតាមបញ្ជារបស់តុលាការឲ្យវិលត្រឡប់ចូលប្រទេសវិញ។

នៅថ្ងៃទី១៧ខែវិច្ឆិកា លោកស្រីត្រូវបានកាត់ទោសប្រហារជីវិតពីបទបញ្ជាឲ្យបង្ក្រាបដោយហិង្សាលើការបះបោរដឹកនាំដោយក្រុមនិស្សិត ដែលបានធ្វើឲ្យអំណាចគ្រប់គ្រងរយៈពេល១៥ឆ្នាំរបស់លោកស្រីត្រូវរលាយសាបសូន្យ។ អង្គការសហប្រជាជាតិបានឲ្យដឹងថា មនុស្សរហូតដល់១៤០០នាក់ត្រូវបានសម្លាប់ក្នុងអំឡុងពេលនៃការបង្ក្រាបនោះ។

លោកស្រី Hasina បានច្រានចោលរាល់ការចោទប្រកាន់ទាំងអស់ថាជាការជម្រុញនយោបាយ។

សូមជម្រាបថា រដ្ឋាភិបាលបង់ក្លាដែស បានស្នើសុំឲ្យឥណ្ឌាធ្វើបត្យាប័នចំនួន៣លើកមកហើយ ចំពោះអតីតនាយករដ្ឋមន្ត្រី Hasina ឲ្យមកទទួលទោសប្រហារជីវិត។ ប៉ុន្តែរហូតមកដល់ពេលនេះ ឥណ្ឌាមិនបានធ្វើអត្ថាធិប្បាយដោយផ្ទាល់លើសំណើសុំធ្វើបត្យាប័ននេះទេ៕

ប្រែសម្រួល៖ ឈាង