រុស្ស៊ី បញ្ជាក់មូលហេតុថ្មីនាំឲ្យផ្ទុះប្រតិបត្តិការសឹកនៅ អ៊ុយក្រែន

លោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ីបានឲ្យដឹងថា ដោយសារតែសត្រូវរបស់រុស្ស៊ីនាំពិភពលោកទៅរកសង្គ្រាមលោកលើកទី៣ និងមហន្តរាយសកល ទើបលោកប្រធានាធិបតី វ្ល៉ាឌីមៀរ ពូទីន បើកប្រតិបត្តិការសឹកលើអ៊ុយក្រែន ។

លោក Medvedev បាននិយាយនៅក្នុងវេទិកាច្បាប់អន្តរជាតិក្នុងទីក្រុង St. Petersburg កាលពីពេលថ្មីៗនេះថា “ដោយសារតែហេតុផលទាំងនេះហើយ ទើបយើងបានសម្រេចចិត្តអនុវត្តប្រតិបត្តិការសឹកមួយនេះ ដើម្បីការពារអធិបតេយ្យភាព បូរណភាពទឹកដី និងការពារសន្តិសុខជូនទៅដល់មនុស្សរាប់លាននាក់របស់យើង” ។

មន្ត្រីរូបនេះបញ្ជាក់ថា “សង្រ្គាមកូនកាត់ពេញលេញមួយកំពុងធ្វើឡើងប្រឆាំងនឹងប្រទេសរបស់យើង ។ អាមេរិក និងអឺរ៉ុប បានផ្ដល់អាវុធដ៍សាហាវគ្រប់ប្រភេទដល់សត្រូវរបស់យើង ពួកគេលើកទឹកចិត្តឲ្យមានភេរវករនៅក្នុងតំបន់ព្រំដែនរបស់រុស្ស៊ី ពួកគេធ្វើសកម្មភាពបំផ្លិចបំផ្លាញ ក៏ដូចជាធ្វើឃាតអ្នកនយោបាយរបស់យើងជាដើម” ។

អតីតប្រធានាធិបតីរុស្ស៊ីរូបនេះបានឲ្យដឹងទៀតថា “តាមគំនិតរបស់លោក សត្រូវរបស់រុស្ស៊ី បានដឹកនាំពិភពលោកទៅកាន់សង្គ្រាមលោកលើកទី៣ ប្រកបដោយប្រសិទ្ធភាព ហើយប្រែវាទៅជាមហន្តរាយសកល ដែលមិនអាចមានអ្នកឈ្នះ ដូចដែលយើងទាំងអស់គ្នាបានដឹងហើយ” ។

គួរបញ្ជាក់ថា រហូតមកដល់ពេលនេះ សង្គ្រាមលុកលុយរបស់រុស្ស៊ីលើអ៊ុយក្រែន បានអូសបន្លាយពេលជាង ១ ឆ្នាំមកហើយ បន្ទាប់ពីលោក ពូទីន ប្រកាសបើកប្រតិបត្តិការសឹកលើរដ្ឋាភិបាលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អាល្លឺម៉ង់ ផ្តល់កញ្ចប់ជំនួយយោធា ធំបំផុតមិនធ្លាប់មាន ឲ្យ អ៊ុយក្រែន