អាល្លឺម៉ង់ ផ្តល់កញ្ចប់ជំនួយយោធា ធំបំផុតមិនធ្លាប់មាន ឲ្យ អ៊ុយក្រែន

កាលពីថ្ងៃអាទិត្យ ទី១៤ ខែឧសភា ប្រទេសអាល្លឺម៉ង់ បានប្រកាសផ្តល់ជំនួយយោធាក្នុងទំហំទឹកប្រាក់ ៣ ពាន់លានដុល្លារបន្ថែមទៀតដល់ទីក្រុងកៀវ ដែលនេះជាជំនួយសព្វាវុធទ្រង់ទ្រាយធំបំផុតរបស់ទីក្រុងបែរឡាំង ចាប់តាំងពីរុស្ស៊ីបើកប្រតិបត្តិការយោធានៅអ៊ុយក្រែនកាលពីឆ្នាំមុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការពារជាតិអាល្លឺម៉ង់ លោក Boris Pistorius បានប្រាប់អ្នកយកព័ត៌មានថា ជំនួយនេះ គឺចង់បង្ហាញថា រដ្ឋាភិបាលទីក្រុងបែរឡាំង ពិតជាគាំទ្រខ្លាំងណាស់ចំពោះអ៊ុយក្រែន។ លោកក៏បានប្តេជ្ញាដែរថា អាល្លឺម៉ង់នឹងបន្តផ្តល់ជំនួយទាំងអស់តាមដែលអាចធ្វើទៅបាន ដរាបណាអ៊ុយក្រែន នៅតែត្រូវការ។

កញ្ចប់នេះរួមមានរថក្រោះ Leopard 1 A5 ចំនួន ៣០ គ្រឿង, រថពាសដែក Marder ២០ គ្រឿង, រថពាសដែកប្រយុទ្ធជាង ១០០ គ្រឿង, កាំភ្លើងធំ Howitzers ១៨ គ្រឿង, យន្តហោះគ្មានមនុស្សបើកឈ្លបយកការណ៍ ២០០ គ្រឿង, ប្រព័ន្ធប្រឆាំងយន្តហោះ IRIS-T SLM ៤ គ្រឿង រួមជាមួយនឹងគ្រាប់រំសេវបន្ថែមទៀតផងដែរ ។

ជំនួយរបស់ទីក្រុងបែរឡាំង កើតឡើងចំពេលប្រធានាធិបតីអ៊ុយក្រែនលោក Vladimir Zelensky ធ្វើទស្សនកិច្ចប្រទេសអាល្លឺម៉ង់ ជាលើកដំបូងចាប់តាំងពីជម្លោះផ្ទុះឡើងកាលពីខែកុម្ភៈ។

ក្នុងអំឡុងពេលនោះ លោក Zelensky បាននិយាយថា ទីក្រុងកៀវ និងសម្ព័ន្ធមិត្តរបស់ខ្លួន អាចធ្វើឲ្យរុស្ស៊ីបរាជ័យហៅលែងឮ នៅដើមឆ្នាំនេះ ។

គួរបញ្ជាក់ថា ក្រៅពីទៅអាល្លឺម៉ង់ លោក Zelensky ក៏បានជួបជាមួយមន្ត្រីអ៊ីតាលី និងសម្តេចប៉ាប Francis ក្នុងទីក្រុងរ៉ូមផងដែរកាលពីថ្ងៃអាទិត្យ ហើយនៅល្ងាចថ្ងៃដដែលនោះ លោកបានជួបប្រធានាធិបតីបារាំង Emmanuel Macron នៅវិមាន Elysee៕

ប្រែសម្រួល៖ Vann Vann

ប្រភព៖ RT, CNA

ចុចអាន៖ អាល្លឺម៉ង់ ខ្ចីដៃ អ៊ុយក្រែន ធ្វើសង្គ្រាមជាមួយ រុស្ស៊ី