រុស្ស៊ី ថា អាមេរិក លើកទឹកចិត្តអ៊ុយក្រែន ឲ្យវាយប្រហារដីរបស់ខ្លួន

ឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន លោក Anatoly Antonov បាននិយាយនៅថ្ងៃពុធទី៣១ខែឧសភាថា សហរដ្ឋអាមេរិក បាននិងកំពុងលើកទឹកចិត្តអ៊ុយក្រែន ឲ្យវាយប្រហារទឹកដីរុស្ស៊ី ថ្វីបើមានការអះអាងផ្ទុយពីនេះក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Antonov អះអាងថា “សេចក្តីថ្លែងការណ៍របស់ទីក្រុងវ៉ាស៊ីនតោន ឆ្លើយតបទៅនឹងការវាយឆ្មក់ដោយយន្តហោះគ្មានមនុស្សបើកនាពេលថ្មីៗនេះ ទៅលើរដ្ឋធានីរុស្ស៊ី ស្តាប់មើលទៅដូចជាការលើកទឹកចិត្តដល់ភេរវករអ៊ុយក្រែន។ តើរដ្ឋបាលអាមេរិក យល់ថា មានគេជឿពាក្យស្លោករបស់ពួកគេ អំពីការមិនគាំទ្រការវាយប្រហាររបស់អ៊ុយក្រែននៅលើទឹកដីរុស្ស៊ីមែនឬទេ?”។

ការកត់សម្គាល់របស់លោក Antonov កើតឡើង បន្ទាប់ពីអ្នកនាំពាក្យសេតវិមាន បានប្រាប់អ្នកសារព័ត៌មានថា “យើងមិនគាំទ្រការវាយប្រហារនៅក្នុងប្រទេសរុស្ស៊ីទេ”។ លោក Antonov ក៏អះអាងដែរថា គោលដៅនៃការវាយប្រហារដោយយន្តហោះគ្មានមនុស្សបើក គឺដើម្បីបង្កភាពភ័យខ្លាចក្នុងចំណោមប្រជាជនរុស្ស៊ី និងធ្វើឲ្យបាត់បង់ទំនុកចិត្តលើអាជ្ញាធរ។

គួរបញ្ជាក់ជាថ្មី យន្តហោះគ្មានមនុស្សបើកផ្ទុកសារធាតុផ្ទុះ បានវាយប្រហារអគារលំនៅដ្ឋានក្នុងទីក្រុងមូស្គូកាលពីព្រឹកថ្ងៃអង្គារទី៣០ខែឧសភា (ពេលវេលានៅរុស្ស៊ី)។

យោងតាមក្រសួងការពារជាតិរុស្ស៊ី, ដ្រូនចំនួន៨គ្រឿង បានចូលរួមក្នុងការវាយប្រហារ ហើយដ្រូនទាំងនោះ ត្រូវបានបំផ្លាញឬស្ទាក់ចាប់ដោយប្រព័ន្ធការពារដែនអាកាស៕

ប្រែសម្រួល៖ Vann Vann

ប្រភព៖ RT

ចុចអាន៖ លែងនៅស្ងៀម! លោកពូទីន ចេញមុខនិយាយអំពីហេតុការណ៍ ដ្រូនវាយប្រហារទីក្រុង មូស្គូ