ក្មេងស្រីចិន លួចលុយឪពុកម្ដាយខំសន្សំជាង ៦ ម៉ឺនដុល្លារ ដើម្បីហ្គេមក្នុងទូរស័ព្ទ

ស្ត្រីជនជាតិចិនម្នាក់ឈ្មោះ វ៉ាង ទើបតែដឹងរឿងកូនស្រីវ័យ ១៣ ឆ្នាំរបស់ខ្លួនចាយលុយសន្សំអស់ ៦៣,១១៦ ដុល្លារ លើហ្គេមទូរស័ព្ទដៃ តាមរយៈគ្រូបង្រៀននៅសាលាដែលសង្កេតឃើញនាងលេងទូរស័ព្ទយូរៗពេក ។

អ្នកស្រី វ៉ាង រស់នៅខេត្តហឺណាន យំដោយរន្ធត់ចិត្តពេលឃើញលុយក្នុងកុងសល់ត្រឹម ០.៥ យ័នប៉ុណ្ណោះ “ខ្ញុំចង់តែបោកក្បាលនឹងដីទេ ពេលខ្ញុំដឹងរឿងដែលបានកើតឡើង ។ តើក្មេងស្រី ១៣ ឆ្នាំម្នាក់អាចធ្វើរឿងបែបនេះបានយ៉ាងដូចម្ដេច?” គាត់និយាយទាំងអួលដើមក ។

បន្ទាប់ពីឪពុករបស់កូនស្រីនោះលាតត្រដាងអ្វីដែលគាត់បានដឹង នាងសារភាពថា ចាយលុយទិញហ្គេមអស់ ១៦៨៤៩,៦៧ ដុល្លារ ទិញរបស់ក្នុងហ្គេម ២៩៤៨៦,៩២ ដុល្លារ និង ១៤០៤១,៣៩ ដុល្លារទៀត សម្រាប់ទិញហ្គេមឲ្យមិត្តរួមថ្នាក់យ៉ាងតិច ១០ នាក់។ តាមពិតនាងក៏ស្ទាក់ស្ទើរមិនចង់ទិញឲ្យមិត្តរួមថ្នាក់ប៉ុន្មានដែរ ប៉ុន្តែពួកគេព្យាយាមឆាឆៅនាងឥតឈប់ឈរ “ខ្ញុំមិនហ៊ានប្រាប់គ្រូទេ ព្រោះខ្លាចម៉ាក់ប៉ាដឹងហើយខឹង” ក្មេងស្រីបន្ថែម ។

ដោយសារនៅក្មេងពេក នាងមិនដឹងឡើយថា ម្ដាយឪពុកខំសន្សំប្រាក់ពិបាកប៉ុនណា ចំណែកឯលេខសម្ងាត់សម្រាប់បើកប្រើគណនីវិញ គឺម្ដាយជាអ្នកឲ្យនាងក្នុងករណីត្រូវការប្រាក់ពេលគ្មានអ្នកនៅផ្ទះ ៕

ប្រែសម្រួល ៖ វារី

ប្រភព ៖ TNP

ចុចអាន ៖ ញៀនហ្គេមខ្លាំងពេក កុមារឥណ្ឌា ច្របាច់.ក សម្លាប់ប្អូនជីដូនមួយខ្លួនឯង