ការផ្ទុះទំនប់អ៊ុយក្រែន គឺជាគ្រោះមហន្តរាយបរិស្ថានអាក្រក់បំផុតរបស់អឺរ៉ុប ចាប់តាំងពីហេតុការណ៍ Chernobyl

ទំហំនៃការបំផ្លិចបំផ្លាញដែលបណ្តាលមកពីការផ្ទុះនៅទំនប់ Kakhovka ត្រូវបានលាតត្រដាងថា ជាគ្រោះមហន្តរាយបរិស្ថានដ៏អាក្រក់បំផុតរបស់អឺរ៉ុប ចាប់តាំងពីហេតុការណ៍ Chernobyl។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងកៀវ បានបញ្ជាក់កាលពីថ្ងៃព្រហស្បតិ៍ ទី៨ ខែមិថុនាថា មនុស្សជិត ២ ម៉ឺននាក់ ត្រូវបានជួយសង្គ្រោះពីទឹកជំនន់ ខណៈ ៤ ម៉ឺននាក់ផ្សេងទៀត ប្រឈមនឹងការជម្លៀស ។

ក្រុមអ្នកជួយសង្គ្រោះ បានប្រើទូកដើម្បីចម្លងមនុស្សដែលភាគច្រើនជាកុមារ និងចាស់ជរា ព្រមទាំងសត្វចិញ្ចឹម តាមផ្លូវដែលលិចទឹក។ 

ទន្ទឹមនេះ ក្រសួងកសិកម្ម និងស្បៀងអាហាររបស់អ៊ុយក្រែន បានព្រមានថា វាលស្រែនៅភាគខាងត្បូងប្រទេស អាចនឹងប្រែក្លាយទៅជាវាលរហោឋាននៅដើមឆ្នាំក្រោយ ដោយសារតែគ្មានប្រភពទឹក។

លើសពីនេះ ប្រជាជនអ៊ុយក្រែនរាប់សែននាក់ ដែលរស់នៅជិតទន្លេ Dnipro ឥឡូវត្រូវប្រឈមមុខនឹងការគំរាមកំហែងនៃសារធាតុគីមីដ៏គ្រោះថ្នាក់និងជំងឺតម្កាត់ បន្ទាប់ពីការបំផ្ទុះដែលទម្លាយទំនប់វារីអគ្គិសនីសម័យសូវៀតកាលពីដើមសប្តាហ៍។

នៅលើ Twitter អនុរដ្ឋមន្ត្រីការបរទេសអ៊ុយក្រែន លោក Andrij Melnyk បានប្រៀបធៀបទឹកជំនន់នេះ ទៅនឹងការផ្ទុះឆ្នាំ១៩៨៦ នៅឯរោងចក្រនុយក្លេអ៊ែរ Chernobyl ដែលបានបញ្ជូនពពកវិទ្យុសកម្មទៅទូទាំងទ្វីបអឺរ៉ុប។

លោកសរសេរថា “វាគ្រោះមហន្តរាយបរិស្ថានដ៏អាក្រក់បំផុតនៅអឺរ៉ុប ចាប់តាំងពីគ្រោះមហន្តរាយផ្ទុះនៅរោងចក្រនុយក្លេអ៊ែរ Chernobyl ។ ​លើក​នេះ ទី​ក្រុង​មូស្គូ​មាន​ចេតនា​ប្រើ​អាវុធ​ប្រល័យ​លោក​ ​ប្រឆាំង​នឹង​អ៊ុយក្រែន។ តើមានអ្នកណាទៀត ចង់ចរចាជាមួយពូទីន?”។

លើសពីនេះ រដ្ឋមន្ត្រីកសិកម្មអ៊ុយក្រែននិយាយថា ៩៥ ភាគរយនៃប្រព័ន្ធធារាសាស្រ្តកសិកម្មនៅ Kherson, ៧៤ ភាគរយនៅ Zaporizhzhia និង ៣០ ភាគរយនៅ Dnipropetrovsk នឹងលែងមានប្រភពទឹក ។

តំបន់ទាំងនេះ បានជួយធ្វើឲ្យអ៊ុយក្រែន ក្លាយជាប្រទេសនាំចេញគ្រាប់ធញ្ញជាតិធំបំផុតរបស់ពិភពលោក។ ការកើនឡើងតម្លៃគ្រាប់ធញ្ញជាតិអន្តរជាតិ ដោយសារតែការកាត់បន្ថយការផ្គត់ផ្គង់ នឹងប៉ះពាល់យ៉ាងខ្លាំងដល់បណ្តាប្រទេស ជាពិសេសនៅអាហ្វ្រិក៕

សូមទស្សនាវីដេអូ៖

ប្រភព៖ Daily Mail

ចុចអាន៖ តួកគី ស្នើបង្កើតគណៈកម្មការអន្តរជាតិ ស៊ើបអង្កេត ករណីបំផ្លាញទំនប់វារីអគ្គិសនី អ៊ុយក្រែន