លោក ដូណាល់ ត្រាំ ត្រូវតុលាការចោទ ពីបទ កាន់កាប់ឯកសារសម្ងាត់

អតីតប្រធានាធិបតីអាមេរិក លោក ដូណាល់ ត្រាំ ត្រូវបានចោទប្រកាន់ពីបទ កាន់កាប់ឯកសារសម្ងាត់ ក្រោយពេលលោកចាកចេញពីសេតវិមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ លោក ត្រាំ បានសរសេរនៅលើបណ្តាញ “សច្ចធម៌សង្គម” ថា “ខ្ញុំមិនដែលគិតថា វាអាចទៅរួចទេដែលរឿងបែបនេះ អាចកើតឡើងចំពោះអតីតប្រធានាធិបតីសហរដ្ឋអាមេរិកមួយរូប។ នេះពិតជាថ្ងៃដ៏ខ្មៅងងឹតសម្រាប់សហរដ្ឋអាមេរិក។ យើងជាប្រទេសដែលមានការធ្លាក់ចុះយ៉ាងធ្ងន់ធ្ងរ និងឆាប់រហ័ស ប៉ុន្តែយើងរួមគ្នាធ្វើឲ្យអាមេរិកអស្ចារ្យម្តងទៀត!”។

គួរបញ្ជាក់ថា នេះគឺជាការចោទប្រកាន់លើកទីពីរចំពោះលោក ត្រាំ ដែលកំពុងឈរឈ្មោះជាបេក្ខជនប្រធានាធិបតីខាងគណបក្សសាធារណរដ្ឋ សម្រាប់ការបោះឆ្នោតឆ្នាំ២០២៤ ។ យ៉ាងណាក្តី ព័ត៌មានលម្អិតនៃការចោទប្រកាន់នេះ មិនត្រូវបានគេបញ្ជាក់ច្បាស់នោះទេ។

ប៉ុន្តែ ប្រព័ន្ធផ្សព្វផ្សាយអាមេរិក រួមទាំង CNN និង ABC News ផងដែរនោះ បានផ្សាយថា លោក ត្រាំ បានរងការចោទប្រកាន់យ៉ាងហោចណាស់ចំនួន ៧ ករណី ។

សូមរម្លឹកឡើងវិញថា លោក ត្រាំ បានក្លាយជាអតីតប្រធានាធិបតីអាមេរិកដំបូងគេ ដែលត្រូវបានចោទប្រកាន់ពីបទឧក្រិដ្ឋកាលពីខែមេសា បន្ទាប់ពីលោកមិនបានសារភាពទោសកំហុសចំពោះការចោទប្រកាន់ ៣៤ ករណី ពាក់ព័ន្ធការក្លែងបន្លំកំណត់ត្រាអាជីវកម្មជុំវិញការបង់ប្រាក់បំបិទមាត់ដល់តារាអាសអាភាសម្នាក់ ហើយលោក​ប្រឈម​នឹង​ការ​កាត់​ទោស​ក្នុង​ករណី​នោះ ​នៅ​ទីក្រុង​ញូវយ៉កនា​ឆ្នាំ​ក្រោយ ៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក ត្រាំ ត្រូវបានរកឃើញមានពិរុទ្ធ ពីបទរំលោភបំពានផ្លូវភេទអ្នកសារព័ត៌មាន