ព័ត៌មានអន្ដរជាតិ

ភូមិត្រជាក់បំផុតលើលោក ស្រាប់តែឡើងកម្តៅខ្លាំងមិនធ្លាប់មានក្នុងកំណត់ត្រា

បានផុស

២ years មុន

នៅ

ថ្ងៃពុធ ៥ កក្កដា ២០២៣

ដោយ

ភូមិ Oymyakon នៅចុងបូព៌ាប្រទេសរុស្ស៊ី ដែលគេស្គាល់ថា ជាកន្លែងមនុស្សតាំងទីលំនៅអចិន្ត្រៃយ៍ត្រជាក់បំផុតលើលោក ស្រាប់តែជួបសីតុណ្ហភាពឡើងខ្ពស់មិនធ្លាប់មានក្នុងកំណត់ត្រា ដោយសាររលកកម្ដៅបណ្ដាលមកពីភ្លើងឆេះព្រៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអង្គារ ទី០៤ ខែកក្កដា សីតុណ្ហភាពក្នុងភូមិ Oymyakon ឡើងដល់ ៣២ អង្សាសេ ពោលគឺខ្ពស់ជាងកំណត់ត្រាចាស់ ១.៥ អង្សាសេ ដែលកត់ត្រាក្នុងឆ្នាំ ១៩៤៩ ។

យោងតាមការបង្ហោះនៅលើបណ្ដាញ Telegram របស់លោក Aisen Nikolaev ប្រមុខនៃសាធារណរដ្ឋ Sakha បានឲ្យដឹងថា ភូមិ Oymyakon គឺជាកន្លែងរងផលប៉ះពាល់ខ្លាំងបំផុតពីភ្លើងឆេះព្រៃដែលកើតឡើងកាលពីសប្ដាហ៍មុន ។

ទន្ទឹមនោះ ការបម្រែបម្រួលអាកាសធាតុក៏បង្កការគំរាមកំហែងយ៉ាងធ្ងន់ធ្ងរដល់តំបន់ Yakutia របស់សាធារណរដ្ឋមួយនេះផងដែរ ដោយសារតែហេដ្ឋារចនាសម្ព័ន្ធជាច្រើនរបស់វាត្រូវបានសាងសង់នៅលើដីកកជានិច្ច ។ ដូច្នេះអ្នកជំនាញព្រមានថា ការរលាយទឹកកកអាចនាំឲ្យមានផលប៉ះពាល់ដល់សង្គម និងសេដ្ឋកិច្ចដ៏សំខាន់នៅក្នុងតំបន់ ។

គួរជម្រាបថា ភូមិ Oymyakon គឺជាកន្លែងត្រជាក់បំផុតនៅអឌ្ឍគោលខាងជើង ដោយបានកត់ត្រាសីតុណ្ហភាពទាបបំផុតគឺ -៦៧.៧ អង្សាសេ ក្នុងឆ្នាំ ១៩៣៣ ប៉ុន្តែបើទោះបីជា សីតុណ្ហភាពទាបយ៉ាងណាក៏ដោយ ក៏ភូមិមួយនេះមានប្រជាជនរស់នៅជាអចិន្ត្រៃយ៍ប្រហែល ៥០០ នាក់ផងដែរ ៕